76 տարեկանում կյանքից հեռացել է հայազգի ուզբեկական բանասեր-ռուսագետ, բանասիրական գիտությունների թեկնածու, Սամարղանդի պետական համալսարանի դոցենտ, հայ համայնքի եռանդուն գործիչ Ռուբեն Նազարյանը: Ծնվել է 1947-ին, Բուխարայում: 1965-1970թթ. ուսանել է Սամարղանդի պետական համալսարանի բանասիրական ֆակուլտետում, 1970-ից դասավանդել այնտեղ: 1980 թվականին Մոսկվայի պետական համալսարանում պաշտպանել է գրականության տեսության գծով թեկնածուական թեզ: Մինչեւ 1991 թվականը դասավանդել է ռուս եւ արտասահմանյան գրականության պատմություն եւ գրականության տեսություն Սամարղանդի պետական համալսարանում, այնուհետեւ աշխատանքի է անցել նույն քաղաքի պետական մանկավարժական ինստիտուտում:
Ռուբեն Նազարյանին համարում էին Սամարղանդի պատմության լավագույն գիտակ: Գրել է ավելի քան 800 բրոշյուրներ, մենագրություններ, զեկույցներ, սցենարներ, բանասիրական, մշակութաբանության, ազգագրագիտական, պատմագիտական, արվեստաբանական գիտական եւ հանրամատչելի հոդվածներ՝ հրատարակված աշխարհի 22 երկրներում, տարբեր լեզուներով:
2007 թվականին Մոսկվայում լույս է տեսել Նազարյանի «Սամարղանդի հայերը» ռուսերեն աշխատությունը: Սամարղանդում կազմակերպել է ռուսաց լեզվի եւ գրականության ուսուցիչների տարածաշրջանային ընկերություն եւ ընտրվել նրա խորհրդի նախագահ (2006 թ.): Եղել է Սամարղանդի եւ նրա ազգային սփյուռքի պատմության մասին տասը վավերագրական հեռուստաֆիլմերի սցենարիստ եւ ռեժիսոր, Սամարղանդի երեք թերթերի («Լույս», «Դարակչի» եւ «Ստանդարտ») կազմակերպիչ եւ խմբագիր, մի քանի ամսագրերի խմբագրական խորհուրդների անդամ, Սամարղանդի «Լույս» հայկական մշակութային կենտրոնի խորհրդի անդամ, SamSU սլավոնական կենտրոնի ղեկավար, Սամարղանդի համալսարանում անցկացվող բանասիրական մեկուկես տասնյակ միջազգային գիտաժողովների կազմակերպիչ եւ այլն:
Ա. Բ.
