Մոսկվաբնակ մեր հայրենակից, ճանաչված երաժիշտ, երգերի հեղինակ Արմեն Գրիգորյանի «Կրեմատորի» ռոք խումբը այս տարի նշում է ստեղծման 40-ամյակը: Դրա շրջանակներում խումբը հանդես է եկել մի շարք նշանակալի նախաձեռնություններով: Հունիսին լույս ընծայվեց խմբի «The Big One» բազմալեզու ալբոմը. սա ռուսական ռոքի պատմության մեջ թերեւս առաջին դեպքն է, երբ որեւէ խումբ թողարկում է տարբեր լեզուներով թարգմանված իր լավագույն երգերի ալբոմը: Գրիգորյանի 16 երգերն անգլերեն, ֆրանսերեն, գերմաներեն, իտալերեն, իսպաներեն եւ չինարեն լեզուներով կատարում են հրավիրյալ օտարերկրյա երգիչները. Գործիքավորումները կատարել են խմբի ներկա եւ նախկին երաժիշտները եւ սեսիոն երաժիշտներ, ինչպես նաեւ՝ սիմֆոնիկ նվագախմբի լարային խումբը: Ըստ քննադատ Լիզա Ժուրավլյովայի («Զվուկ» պորտալ)՝ «անսովոր մեկնաբանություններով «Կրեմատորիի» երգերը նոր ժանրերի՝ ինչպիսիք են քանթրին եւ նույնիսկ դարք կաբարեն, թարմ գունավորում են ստացել, սակայն չեն կորցրել խմբի ճանաչելի հնչողությունը»: Ալբոմը թողարկվել է տարբեր ձեւաչափերով՝ թվային տարբերակ՝ սթրիմինգային ծառայությունների համար, խտասալիկ եւ վինիլային ձայնասկավառակ: Դրա ստեղծման համար կազմակերպվել է քրաուդֆանդինգ (նվիրահավաք), որի միջոցով խումբը հավաքել է 3 միլիոն ռուբլուց ավելի գումար: «Մոսկովսկի կոմսոմոլեց» թերթը (2023 թ. հունիսի 6) ալբոմն անվանել է ամառվա սկզբի ամենաուշագրավ թողարկումներից մեկը:
Գրիգորյանը պատմում է, որ սկզբում որպես կանոն երաժշտությունն է գրում, իսկ խոսքերը հետո են գալիս, այդ պատճառով նրան միշտ հետաքրքրել է, թե ինչպես իր երգերը կինքնադրսեւորվեն այլ լեզուներով «հանդերձավորելու» դեպքում: Նա կարծում է, որ որոշ լեզուների ֆոնետիկ հնչողությունը կհարստացնի իր երգերը: Երգերի մեծ մասն անգլերեն է, դրանք կատարում է հոլիվուդյան դերասան եւ երգիչ Սթիվ Բենինգթոնը: Նրա ձայնն է հնչում նաեւ հայկական թեմայով ու հնչողությամբ ստեղծված «Արարատի ձյուները» երգում, որի պրոդյուսերն է ամերիկացի Քայլ Հոլանդը: Արդյունքում, ըստ քննադատների, երգը վերածվել է թախծոտ թավշյա բլյուզի: «Տձեւ Էլզան», որի մեջ հնչում է հայկական քոչարու փոփոխված կիթառային տարբերակը, եւս անգլերեն է: Իսկ «Դոն Պեդրոն» ձայնագրվել է Մեքսիկայում՝ տեղացի օպերային բասի կողմից: «Չինական տանկը», ինչպես եւ սպասելի է, կատարվել է հյուսիս-չինական բարբառով, որն առավել հայտնի է մանդարին անվանմամբ:
Բացի այդ, խումբը պատրաստվում է թողարկել «Քաղցր Էլվիս» նոր երգերի ալբոմը եւ 40 տարվա լավագույն երգերի ընտրանին: Առաջիկայում սպասվում է Ջորջ Օրուելի վիպակի մոտիվներով Արմեն Գրիգորյանի «Անասնաֆերմայի պատրանքները» դասական բալետի թողարկումը: Բացի այդ, «Կրեմատորին» օգոստոսին կայանալիք տարվա կարեւորագույն ռուսաստանյան երաժշտական իրադարձություններից մեկի՝ «Չեռնոզյոմ» ռոք փառատոնի առաջատարներից է լինելու:
«Կրեմատորին» (թարգմանաբար՝ դիակիզարան) գոյություն ունի 1983 թվականից, այդ ընթացքում թողարկել է տասնյակ ստուդիական եւ համերգային ալբոմներ: Այն Ռուսաստանում հայտնի է նաեւ «Աշխարհի ամենաուրախ համույթ» անվանմամբ (երգերից մեկի վերնագիրն է):
ԱՇՈՏ ԳՐԻԳՈՐՅԱՆ
