ՀՀ Գիտությունների ազգային ակադեմիայի Սեւանա լճի պահպանության փորձագիտական հանձնաժողովում քննարկվել է ՀՀ կառավարության «Ոռոգման նպատակով 2022 թվականին Սեւանա լճից ջրառի մասին» որոշման նախագիծը: Այն հանձնաժողովի կարծիքին է ներկայացրել ՀՀ տարածքային կառավարման եւ ենթակառուցվածքների նախարարության Ջրային կոմիտեն: Հանձնաժողովը համաձայնություն է տվել Սեւանա լճից մինչեւ 170 միլիոն խմ ջրառի չափաքանակին:
Ըստ «Ոռոգման նպատակով 2022 թվականին Սեւանա լճից ջրառի մասին» որոշման նախագծի, Սեւանա լճից 170 միլիոն խմ ջրառի չափաքանակը համապատասխանում է «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքով հաստատված առավելագույն չափաքանակին:
Սեւանա լճի պահպանության փորձագիտական հանձնաժողովում քննարկվել է նաեւ «Արփա-Սեւան» թիվ 2 թունելի տեխնիկական վիճակի ուսումնասիրությունների արդյունքները:
Ստեփան ՊԱՊԻԿՅԱՆ
