Պատճառը քաղաքական ճնշո՞ւմն է
2018-ի քաղաքական վերադասավորումներից կարճ ժամանակ անց ասպարեզ եկած «Ադեկվատ» միաբանության ձայն-ծպտունը չի լսվում: Ընդդիմադիր սուր ելույթներով եւ հրապարակային գործունեությամբ աչքի ընկած կազմակերպությունը, որ 2019-ին սեպտեմբերի 7-ի հիմնադիր համագումարով նաեւ կուսակցություն դարձավ, ավելի քան մեկ տարի սուսուփուս մի կողմ քաշվեց: Կուսակցության առաջնորդ Արթուր Դանիելյանն հրապարակային հայտարարություններ, Facebook-ում գրառումներ էր անում նաեւ 2020-ի 44-օրյա պատերազմի ժամանակ: Բայց պատերազմի ավարտից հետո նրա ձայնը եւս լսելի չէ: 2019-2020 թթ. միաբանություն-կուսակցության անդամները հաճախ էին հայտնվում իրավապահ մարմիների ուշադրության կենտրոնում: Իշխող թիմի եւ վարչապետ Նիկոլ Փաշինյանի դեմ պիկետներ էին նախաձեռնում թե՛ նախագահականի, թե՛ կառավարության, թե՛ Ազգային ժողովի շենքի առջեւ: «Ազգ»-ի տեղեկություններով՝ կուսակցության որոշ անդամներ եւ համակիրներ նույնիսկ լքել են Հայաստանը եւ տարբեր կարգավիճակով՝ հաստատվել այլ երկրներում: Ի՞նչ եղավ «Ադեկվատ»-ներին, որ հանկարծ, միանգամից ու կտրուկ մի կողմ քաշվեցին: Գուցե՞ իշխանության՝ ճշնում գործադրող կամ վախեցնող լծակները նաեւ նրա՞նց են հասել, որ որոշել են լռել ու ահաբեկված լքել Հայաստանը: Հարցերի պատասխանը «Ազգ»-ը փորձել է ստանալ միաբանության անդամ Կոնստանտին Տեր-Նակալյանից:
– Պարոն Տեր-Նակալյան, «Ադեկվատ»-ի ձայնն ինչո՞ւ չենք լսում:
– Հրապարակային գործունեություն չենք ծավալում:
–Իսկ ինչո՞վ է դա պայմանավորված:
– Կենտորնացած ենք մեր ենթակառուցվածքները զարգացնելու եւ կայունացնելու գործում:
– Այսինքն՝ վերջակետ չե՞ք դրել, դռներն էլ կողպել ու «տուն» գնացել:
– Իհարկե՛ ոչ:
– Գուցե քաղաքական ճնշումնե՞ր են եղել, որ նախընտրել եք գործունեության «անաղմուկ» տարբերակը:
– Ընթացիկ որեւէ բանի մասին՝ քաղաքական, տնտեսական եւ այլն, մեկնաբանություն չենք անում: Հրապարակային խոսք չենք ասում, չենք արձագանքում ոչ մի բանի: «Ադեկվատ»-ը ո՛չ դադարեցրել է իր գոյությունը, ո՛չ փակվել, ուղղղակի այս փուլում առավել նպատակահարմար ենք գտնում զբաղվել կազմակերպության ներքին հարցերով:
– Բայց եթե հրապարակային գործունեությամբ չեք զբաղվում, քաղաքական ճնշումների հարցն էլ չեք մեկնաբանում, դա ինքնին ենթադրում է, որ, այուամենայիվ, հնարավոր է՝ իշխանությունը ճնշումներ է գործադրել կամ վախեցրել:
– Մենք ճնշումներից ո՛չ էն ժամանակ էինք վախենում, ո՛չ էլ՝ այժմ: Ապագայում էլ չենք վախենալու:
– Ձեր թիմակիցներից այս պահին անազատության մեջ գտնվողներ, կամ, առհասարակ, իրավական գործընթացով անցնողներ կա՞ն:
– Անազատության մեջ գտնվողներ չկան, քրեական գործով անցնում էր միաբանության ղեկավար Արթուր Դանիելյանը, բայց այն այժմ կարճված է: Քրգործը կապված էր Ազգային ժողովի նախագահ Ալեն Սիմոնյանի հետ ունեցած միջադեպի հետ: (Երեւանի Արամի-Մաշտոցի փողոցների հարակից այգում վերջիններիս միջեւ ծեծկռտուք էր տեղի ունեցել): Դանիելյանն այժմ այցնում է քաղաքացիական գործով, որ չի բացառվում, կարող է քրեականի վերափոխվել:
