Լաչինի միջանցքում ու դրա հետեւանքով նաեւ Արցախում ադրբեջանցիների ստեղծած լարված իրավիճակին ռուսական լրատվամիջոցների առաջին օրերի արձագանքները հիմնականում տեղեկատվական բնույթի են, բայց կան նաեւ վերլուծության տարրեր:
«Մոսկովսկի կոմսոմոլեց» («ՄԿ») թերթի էլեկտրոնային կայքէջի ամսի 14-ի հրապարակումը վերնագրված է «Լեռնային Ղարաբաղը հայտնվել է լիակատար շրջափակման մեջ առանց պարենի ու գազի», դրա տակ նաեւ ավելացված է «Խաղաղապահները հայտնվել են մուրճի ու զնդանի արանքում»:
«Այսպես կոչված ադրբեջանական բնապահպան ակտիվիստները, որոնց թվում ներկա են հանկարծ բնապահպանական խնդիրներով մտահոգված աջ արմատական «Բոզկուրտ» («Գորշ գայլեր» – Գ. Մ.) պանթուրքական կազմակերպության կողմնակիցներ, շարունակում են Ղարաբաղը Հայաստանի հետ կապող Ստեփանակերտ-Գորիս մայրուղու շրջափակումը»,- տեղեկացնում է հոդվածի հեղինակը, հավելելով, որ միջանցքի փակումը հանգեցրել է նաեւ Շուշիի շրջանի Մեծ Շեն, Հին Շեն, Եղցահող եւ Լիսագոր գյուղերի շրջափակմանը՝ դրանից բխող հետեւանքներով:
Անդրադարձ կատարելով ադրբեջանական ու հայկական կողմերի պահանջների միջեւ հայտնված ռուս խաղաղապահների աննպաստ վիճակին, շրջափակումը դադարեցնելու ԱՄՆ-ից ու Ֆրանսիայից հնչած կոչերին Բաքվի չանսալուն, ադրբեջանցիների կողմից Արցախի արդեն կրկնվող (առաջինը՝ այս տարվա լույս մարտի 9-ի գիշերը) գազային շրջափակմանը, հոդվածագիրը ներկայացնում է ՌԴ ԱԳՆ Մոսկվայի միջազգային հարաբերությունների պետական ինստիտւտի ավագ դասախոս Ալեքսեյ Զուդինի արձագանքը ստեղծված իրավիճակին: Ըստ վերջինիս, այս տարածաշրջանային հակամարտությունը, որն առաջին հայացքից սկսել էր մարել, բայց փաստորեն պարբերաբար սրվում է, ասում է այն մասին, որ կողմերը բավարարված չեն ռազմական բախումների ընթացքում եւ կարգավորման գործընթացում ձեռք բերված արդյունքներից:
«Իրադարձությունների հետագա ընթացքը մեծ մասամբ կախված է այն բանից, թե որքանով է ադրբեջանական կողմն իր գործողություններում ինքնուրույն,- կայքէջի մատուցմամբ՝ նկատել է ռուս փորձագետը:- Մինչեւ վերջ հայտնի չէ՝ Ադրբեջա՞նն է արդյոք իրավիճակի սրման նախաձեռնողը, եթե նրա թիկունքում կանգնած է Թուրքիան»:
Զուդինի գնահատմամբ, եթե Ադրբեջանն ինքնուրույն է գործում, Ռուսաստանի համար ավելի հեշտ կլինի: Անշուշտ, նկատի ունի կարգավորման միջնորդական առաքելությունը: «Հակառակ դեպքում ռուսական ջանքերը լրացուցիչ դժվարությունների դեմ կառնեն: Թուրքիայի զգալի ներկայությունը նշանակում է, որ կարգավորման համար այլ ջանքեր են պահանջվելու»:
Եթե իրավիճակի սրմանը Թուրքիայի մասնակցությունը կա, ապա այդ դեպքում, քաղաքագետի խոսքով, «մեծ հավանականությամբ կարելի է ենթադրել, որ սա մաս է կազմում այն խաղի, որը մշտապես վարում է Էրդողանը»:
ԳԵՂԱՄ ՄԿՐՏՉՅԱՆ
