ABC News.- Շերը հպարտ ամերիկահայ է եւ օգտագործում է իր, ինչպես ինքն է ասում, «քաղաքական կապիտալը»՝ կոչ անելով ԱՄՆ կառավարությանը օգնության հասնել Արեւմտյան Ասիայում ներկայումս հարձակման ենթարկվող հայերին:
«Նյուզվիքի» հոդվածը Շերը գրել է իր ընկերոջ՝ ամերիկահայ բժիշկ, հումանիստ եւ կինոպրոդյուսեր Էրիկ Էսրայելյանի հետ: «Դուք չեք կարող մեզ բնաջնջել» վերնագրի ներքո նկարագրում է, թե ինչպես են Հայաստանի ժողովուրդը եւ Արցախի անջատ պետությունը՝ հայոց նախնյաց հայրենի հողը, «դիմանում դաժան արշավին», որը սպառնում է ավելի քան 120,000 մարդու:
Հայաստանն ու հարեւան Ադրբեջանը մարտնչում են Արցախի համար, եւ Ադրբեջանը շրջափակել է երկու տարածքների միջեւ միակ ճանապարհը՝ դադարեցնելով սննդի եւ մատակարարումների առաքումը։
Ադրբեջանը նաեւ ոչնչացրել է տարածքի որոշ ամենասրբազան քրիստոնեական հուշարձաններ, ասվում է հոդվածում։ Շերը եւ Էսրայելյանն այդ երկրի գործողությունները բնութագրում են որպես «էթնիկ զտումների արշավ» եւ բարբարոսական ու «մշակութային հետքի ջնջման լկտի փորձ»: Ըստ հոդվածի՝ Ադրբեջանում երեխաներին պաշտոնապես ատելություն են ներշնչում հայերի նկատմամբ:
«Մենք կշարունակենք ներկայացնել մեր պատմությունները՝ օգնելու մեր հայրենիքում ապրող մեր եղբայրներին եւ քույրերին եւ աջակցելու մեր սրբատեղիների պաշտպանությանը»,- գրում են Շերը եւ Էսրայելյանը:
«Իր հերթին, մենք խնդրում ենք Միացյալ Նահանգների մեր քաղաքական առաջնորդներին եւ ամբողջ աշխարհի մարդկանց, ովքեր պաշտպանում են արդարությունն ու պարկեշտությունը, բոյկոտել եւ պատժել այս մարդասպան ռեժիմներին, դադարեցնել փողի անդադար հոսքը դեպի այդ ռեժիմներ եւ կիրառել ավելի հետեւողական չափանիշներ, երբ խոսքը վերաբերում է մարդու իրավունքների պաշտպանությանը»:
Վերջերս Շերը եւ Էսրայելյանը մասնակցեցին ամերիկահայի պատկանող «Մեթալ ալքիմիսթ» ոսկերչական ապրանքանիշի նախաձեռնությանը, որպեսզի ստեղծվեն եւ վաճառվեն ապարանջաններ, որի հասույթը կհատկացվի հայկական սրբավայրերի վերականգնմանը:
Անգլերենից թարգմանեց ԱՇՈՏ ԳՐԻԳՈՐՅԱՆԸ
