Նյու Յորքի Հանրային գրադարանը (NYPL) նոյեմբերի 16-ին պաշտոնապես հայտարարել է, որ հումանիտար հետազոտությունների իր նոր կենտրոնը կրելու է գրադարանի նախկին նախագահ դոկտ. Վարդան Գրիգորյանի անունը, որպես երախտագիտություն վերջինիս արտակարգ հմուտ ղեկավարության, որի շնորհիվ վերակենդանացել է գրադարանի գործունեությունը եւ ամրապնդել դիրքերը որպես կրթական անփոխարինելի հաստատություն: Գրադարանի հոգաբարձուների վարչությունը նախորդ օրը գումարված հանդիպմանը միաձայն էր քվեարկել գրադարանի Սթիվն Շվարցման մասնաշենքում գտնվող նոր կենտրոնի անվանակոչությանը: Դոկտ. Վարդան Գրիգորյանը NYPL գրադարանի նախագահն էր եղել 1981-1989 թվականներին: Այդ ընթացքում նրա անձնական դերակատարության շնորհիվ զգալիորեն ավելացել էր հետազոտական աշխատանքների քանակը, հավաքածուների ձեռքբերումը եւ շրջանառությունը (Գրիգորյանն իր անձնական գրադարանից գրքեր էր նվիրել), ինչպես նաեւ ընդարձակվել էր ուսումնասիրությունների բնագավառը:
Նոր կենտրոնի կայացման գործում անգնահատելի աջակցություն ցուցաբերելու համար գրադարանի աշխատակիցները շնորհակալություն են հայտնել Նյու Յորքի Կառնեգի կորպորացիային, որի նախագահն էր եղել Վարդան Գրիգորյանը 1997-ից մինչեւ իր մահը` 2021 թվականը, եւ նրա բազում գործընկերներին եւ բարեկամներին:
Նոր կենտրոնը, որը 200 միլիոն դոլարի վերանորոգման աշխատանքների մի մասն էր կազմում, ոչ միայն հնարավորություն է տալու աշխատանքային գերազանց մթնոլորտ ստեղծելու մինչեւ 400 հետազոտողների համար, այլեւ գիտական միջոցառումներ, դասընթացներ եւ ցուցահանդեսներ կազմակերպելու համար:
«Անկարելի է գերագնահատել Վարդան Գրիգորյանի ազդեցությունը գրադարանի գործունեության մեջ: Նրան ճանաաչում էին որպես «Գրադարանը փրկողի», բայց ես կավելացնեի, որ դժվարին ժամանակներում գիտելիքների տարածման բնագավառում նրա ներդրած ջանքերը փրկեցին նաեւ ամբողջ Նյու Յորք քաղաքը: Մենք պետք է ներշնչվենք նրա ժառանգությունից եւ կարողանանք նավարկել ներկայի փոփոխական ժամանակներում», նշել է NYPL-ի գործող նախագահ Էնթոնի Մարքսը: Իսկ Նյու Յորքի Կառնեգի կորպորացիայի նախագահ Տիկին Լուիզ Ռիչարդսոնը հավելել է. «Եթե ճանաչում էիք Վարդանին, ապա գիտեք, որ նա սիրում էր գրադարանները եւ համարում դրանց մարդկային երեւակայությունը վերանորոգող եւ մատոծողությունը խթանող ու ընդարձակող «օազիսներ»: Չեմ կարող ավելի սազական գնահատանք պատկերացնել, քան այս կենտրոնը նրա անունով կոչելը: Դա թույլ է տալու ապագա հետազոտողներին անսահման թեւեր տալ իրենց երեւակայությանը` ճախրելու եւ նվաճելու նորանոր բարձունքներ»:
Դոկտ. Գրիգորյանի զավակներ Վահե, Րաֆֆի եւ Դարեհ Գրիգորյանները շնորհակալական իրենց խոսքում նշել են, որ «Նյու Յորք Թայմսի» իրենց հորը նվիրված գեղեցիկ մահախոսականի` «Նյու Յորքի հանրային գրադարանը փրկողը» վերնագիրը խիստ հատկանշական էր: «Այն իր անցած կյանքի, գիտելիքի հանդեպ նվիրվածության եւ հոգեւոր էության լավագույն գնահատականն էր: Խորապես երախտապարտ ենք, որ այս կենտրոնը հավերժացնելու է իր հումանիզմը` համբերությամբ եւ տոկունությամբ տեր կանգնելով մեր սիրելի «Գրական առյուծի» ժառանգությանը», ասել են նրանք:
Պատրաստեց`ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
Լուսանկարում` Դոկտ. Վ. Գրիգորյանը 1998-ին պարգեւատրվում է «Հումանիտար գիտությունների ազգային մեդալով»` ձեռամբ նախագահ Բիլ եւ առաջին տիկին Հիլարի Քլինթոնների, դառնալով ԱՄՆ-ի 9-րդ քաղաքացին, որն արժանանում է այդ մեդալին:
