Կանադական «Սաբըրբան» եւ այլ կայքէջեր հրատարակել են հոդվածներ անցյալ օգոստոսի 31-ին նկարչուհի Նորմա Աքելյանի՝ Մոնրեալի «Էրգա» ցուցասրահում բացված առաջին անհատական ցուցահանդեսի մասին: Ներկայացված գրեթե բոլոր աշխատանքները վաճառվել են: Նշվում է, որ արդեն 31 տարի է, ինչ 71-ամյա Աքելյանը ոսկերչական դիզայների կարիերայից անցել է դեկորատիվ նկարչության, այնուհետեւ՝ վիզուալ արվեստի: Ցուցահանդեսի հասույթի մի մասը տրվելու է ընտանեկան բռնության դեմ պայքարող «Աթենա ընտանեկան ծառայությունների պաշտպանություն», մեկ մասն էլ՝ «Հայ ընտանիքների սատարման ծառայություններ» կազմակերպություններին:
«Ես ինձ ժամանակակից իմպրեսիոնիստ եմ համարում,- ասում է Նորմա Աքելյանը, որն Ինսթագրամում 46,000 հետեւորդ ունի:- Ես ձգտում եմ ժամանակի մի պահը դրոշմել իմ շրջապատի էության միջոցով: Յուրաքանչյուր կտավ ճանապարհորդություն է. յուրաքանչյուր նկար իմ ներկա ժամանակի փորձառությունների եւ հոգեվիճակի արտացոլումն է: Զարդերի ձեւավորման մեջ իմ անցյալի մնացորդները երբեմն տեսանելի են իմ նկարներում՝ զարդանախշերով եւ ոսկու տերեւների ճոխ կիրառմամբ: Արվեստը կարող է լինել անհատական վերափոխման հզոր գործիք եւ միջոց»:
Նորմա Աքելյանն ամուսնացած է Կանադայի մարգարիտ տարածող ամենամեծ ընկերության՝ «Ջեմ քանադիանի» նախագահ Պիեռ Աքելյանի հետ, ունի երեք չափահաս զավակ: Նրանցից Պետրոսը՝ Սփայդի բեմական անունով, հայտնի է որպես աճպարար, որը ելույթ է ունեցել ամբողջ աշխարհում եւ «Նեթֆլիքսում», իսկ Արքան եւ Ալիքը «Նիշի փըրլզ» մարգարիտների ֆիրմայի համահիմնադիրներն են: Արքան նաեւ նկարիչ է, որը մոր ցուցահանդեսում ներկայացրել է նաեւ իր նկարներից մի քանիսը:
Ա. Բ.
