Լույս է տեսել «Մուզարտ» դաշնամուրի մեթոդ-ինքնուսույցը՝ նախատեսված սկսնակ մեծահասակների համար: Հեղինակը դաշնակահար, մանկավարժ եւ երաժշտագետ Աննա Ադամյանն է: Մեր իրականության մեջ այն եզակի ձեռնարկ է, որը նպատակ ունի հասարակության լայն շրջանակներում սերմանել սեր եւ հետաքրքրություն դեպի երաժշտությունը եւ խթանել դաշնամուրի սիրողական ուսուցումը:
Ձեռնարկում կիրառելով երաժշտության պատմության, տեսության եւ գործնական կարողությունների միասնական մոտեցման նորարարական սկզբունքը դեպի երաժշտական ստեղծագործություն՝ հեղինակը փորձ է կատարել պասիվ երաժշտասերից անցում կատարել դեպի ակտիվ երաժշտասեր կերտելու գործին:
«Մուզարտը» նախատեսված է` ա) Սկսնակ մեծահասակների՝ ուսանողների, երիտասարդ մասնագետների, միջին եւ բարձր տարիքի անձանց սիրողական ուսուցման համար, բ) երաժշտությամբ զբաղվող երեխաների համար, որոնք կարող են ունենալ այն որպես շտեմարան եւ օգտվել դասատուի ուղղորդմամբ, գ) երիտասարդ եւ սկսնակ դասավանդողների համար կարող է ծառայել որպես մեթոդական ձեռնարկ, նպաստել դասերը ավելի հագեցած ու հետաքրքրական դարձնելուն:
Ձեռնարկը պարունակում է` ա) 12 դաս, որոնցից յուրաքանչյուրը նվիրված է որեւէ դարաշրջանի երաժշտությանը, այդ դարաշրջանին պատկանող ստեղծագործության ընդգրկմամբ, սկսած երաժշտության ծագման պատմությունից մինչեւ մեր օրերի երաժշտությունը, բ) QR կոդեր, որոնք հնարավորություն են ստեղծում ունկնդրել տվյալ դարաշրջանին պատկանող երաժշտական ստեղծագործություն, ինչպես նաեւ սովորել եւ կատարել դաշնամուրային ստեղծագործություն՝ հետեւելով հեղինակի կատարմանը յութուբյան ալիքում, գ) երաժշտական տերմինների համառոտ բառարան, ինչն անհրաժեշտություն է թե՛ սիրողական, թե՛ պրոֆեսիոնալ ուսուցման համար, դ) նոտային հավելված, որտեղ տեղ են գտել շուրջ 20 հանրահայտ երաժշտական ստեղծագործություններ եւ մշակումներ՝ Կոմիտասի «Կաքավիկից» մինչեւ Աստոր Պյացոլլայի «Լիբեռտանգոն»:
Գիրքը վաճառվում է Երեւանի մեծ գրախանութներում, ինչպես նաեւ կարող եք ձեռք բերել, գրելով «Մուզարտի» ֆեյսբուքյան էջին՝ https://www.facebook.com/Moozart.lab: Էլեկտրոնային տարբերակը կարող եք ներբեռնել հետեւյալ հարթակից՝ https://www.mymusicresource.com/shop/piano/moozart-piano-method-manual-in-armenian/
Ա. Բ.
