Տրանսիլվանիայի (Ռումինիա) Տըրգու-Մուրեշ քաղաքում գործող Հայ-հունգարական մշակութային ընկերակցությունը եւ «Կաստելում» հիմնադրամը վերջերս Տրանսիլվանիայի ոչ պաշտոնական մայրաքաղաք Կլուժում կազմակերպել էր հանդիպում, որի ընթացքում ներկաները ծանոթացել են հունգարահայ Լուկաչ ազնվական ընտանիքի պատմությանը եւ հանդիպել ընտանիքի հետնորդ, Լիմայի (Պերու) Սան Մարտին դե Պորես համալսարանի դասախոս, քաղաքագետ, փիլիսոփա, մշակութաբան Միկլոշ Վայկ Լուկաչ Պերենիի հետ: Ըստ Հայ-հունգարական մշակութային ընկերակցության նախագահ դոկտոր Աթիլա Պուշկաշի՝ պերուացի դասախոսի հետ հարաբերությունները ստեղծվել են հայազգի հունգարական բանաստեղծուհի Էվա Անկայի՝ 1941 թվականին տպագրված բանաստեղծությունների հատորը վերահրատարակելու մտադրության առթիվ: Անկայի հետնորդներին փնտրելիս տեղեկացել են Պերուում բնակվող Միկլոշ Վայկ Լուկաչ Պերենիի մասին: Միկլոշը վերջին կես տարում ապրում եւ որպես հրավիրյալ դասախոս դասավանդում է Հունգարիայում, ինչը նրան թույլ է տվել այցելել Տրանսիլվանիա եւ փնտրել իր արմատները:
Հանդիպման ընթացքում պատմաբան դոկտոր Աթիլա Կալման հակիրճ ներկայացրել է Տրանսիլվանիայի հունգարահայ ազնվական Լուկաչ ընտանիքի պատմությունը` շեշտը դնելով պետական գործիչ, կրոնի եւ կրթության նախարար Դյորդ Լուկաչի (1865-1950) եւ նրա ժառանգների կյանքի ուղու վրա: Իր խոսքում հյուրը՝ Միկլոշ Վայկ Լուկաչ Պերենին, պատմել է նախնիների մասին, թե ինչպես է Էվա տատիկը փորձել փրկել կորստի դատապարտված հունգարերենը՝ թոռների համար կարդալով իր բանաստեղծություններն ու վեպերը: Հունգարահայ հոր եւ պերուացի մոր զավակ Միկլոշ Վայկ Լուկաչ Պերենին այժմ ապրում է Անգլիայում, բայց դասավանդում է Լիմայի համալսարանում: Նա սովորում է հունգարերեն եւ, ինչպես խոստովանել է միջոցառման ժամանակ, Տրանսիլվանիա կատարած իր այցը զգալիորեն ամրապնդել է իր հունգարահայ ինքնագիտակցությունը: Միջոցառման վերջում նա ներկաների համար ընծայագրեց տատիկի՝ Էվա Անկայի բանաստեղծությունների՝ վերջերս հրատարակված հատորը:
Ա. Բ.
