Օրերս Հայաստանի ազգային կինոկենտրոնը հայտնեց, որ Արմինե Անդայի «Թռչող տերեւների երգը» անիմացիոն կարճամետրաժ ֆիլմը ներառվել է Բրազիլիայի Ֆանտասպոա Պորտո Ալեգրիի ֆանտաստիկ ֆիլմերի միջազգային փառատոնի եւ Անիմատիբա անվամբ հայտնի միջազգային անիմացիոն փառատոնի պաշտոնական մրցույթներում: Հարկ է նշել, որ ֆիլմը ստացել է պետական ֆինանսական աջակցություն:
Ֆիլմի ռեժիսորն Արմինե Անդան է, սցենարիստներն են Արմինե Անդան, Ռոման Բալայանը, կոմպոզիտոր՝ Միքայել Ոսկանյանը, բեմադրող նկարիչ՝ Աննա Հակոբյանը, դերերում՝ Արմինե Անդա, Գագիկ Ղազարէհ, պրոդյուսերներ՝ Արմինե Անդա, Աշկան Ռահգոզար, Արման Ռահգոզար, ընկերություններ՝ Հոշկի ֆիլմ (Հայաստան), Հուրախշ Ստուդիոզ (Իրան):
Ֆիլմի բովանդակությունը հետեւյալն է. Ճանապարհորդություն դեպի երազանք՝ անտառում ապրող ու տերեւների ծածկոցի տակ գիշերներ լուսացնող 12 տարեկան Սունայի եւ թաքնված գիտելիքի տիրապետող 200 տարեկան Ծերունու հանդիպման միջով: Ներկայացվում է հոր ու դստեր, ուսուցչի եւ աշակերտի, մեծահասակի եւ փոքրահասակի հուզիչ ընկերությունն ու անհնարինը հնարավոր դարձնելու նրանց ճանապարհը:
ԿԱՐԵՆ ՄԿՐՏՉՅԱՆ
