Ադրբեջանի եւ Հայաստանի Հանրապետության միջեւ սկսված «սահմանազատման եւ սահմանագծման» գործընթացից պարզ դարձավ, որ ՀՀ իշխող վարչախումբը մտադիր է հակառակորդին միակողմանիորեն զիջել Տավուշի մարզի չորս գյուղերի տարածքների զգալի մասը: Տեղաբնիկ ժողովուրդը` Հայ Առաքելյան եկեղեցու Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ, բնականաբար, ընդվզեց եւ ոտքի կանգնեց՝ թույլ չտալու այդ ապօրինի գործընթացը: Արդարացի շարժումն աստիճանաբար ընդլայնվեց, եւ ոչ միայն ողջունեցին, այլեւ դրան միացան ինչպես հայաստանաբնակ, այնպես էլ սփյուռքի՝ մեծ թվով սթափ մտածող եւ երկրի ու Հայոց պետականության վտանգված լինելուն ոչ անտարբեր մեր բյուրավոր հայրենակիցներ, այդ թվում` Հայ Ազգային Ռամկավար կուսակցությունը, որի մեծ թվով անդամներ առաջին իսկ պահից մասնակցում եւ նեցուկ են Շարժմանը:
Հանուն հայ ժողովրդի լուսավոր ապագայի, հայոց անխախտ պետականության, Սահմանադրության եւ բոլոր օրենքների անշեղ պահպանման` Շարժումն օրըստօրե ծավալվում ու թափ է հավաքում: Միաժամանակ, այն աստիճանաբար բացահայտում է հայրենանվեր ծրագրերի կողմնակիցներին ու սոսկ անձնական շահերով առաջնորդվող պատեհապաշտներին:
Հայ Ազգային Ռամկավար կուսակցությունը (գտնվում է պետական գրանցման գործընթացում) խորությամբ տեղյակ լիելով Հայրենիքին ու հայ ժողովրդին սպառնացող վտանգներին եւ գիտակցելով պահի լրջությունը, իր լիակատար զորակցությունն է հայտնում Հանուն Տավուշի համաժողովրդական շարժմանը եւ հայտարարում է, որ բոլոր հնարավոր միջոցներով կսատարի դրան:
ՀԱՅ ԱԶԳԱՅԻՆ ՌԱՄԿԱՎԱՐ ԿՈՒՍԱԿՑՈՒԹՅՈՒՆ
(Պետական գրանցման գործընթացում)
