Դեկտեմբերի 15-ին Գերմանիայի Ցվիկաու քաղաքի Փլաուեն-Ցվիկաու թատրոնում տեղի է ունեցել «Հազարան բլբուլ» հայկական հեքիաթի երաժշտական բեմադրության առաջնախաղը: Հեքիաթի գրական տարբերակն իրականացրել է դրամատուրգ Անդրե Մայերը, բեմադրիչն է Յուրգեն Փյոքելը, իսկ երաժշտական տարբերակի եւ մշակման պատասխանատուն է Գիսենի թատրոնի նվագավար Վլադիմիր Յասկորսկին:
Հազարան բլբուլի երգով չոր հողը նորից ծաղկում է, բայց կախարդական թռչունին գտնելը վտանգավոր արկածախնդրություն է: Թագավորի երեք որդիները քաջաբար փնտրում են նրան՝ ունենալով տարբեր շարժառիթներ: Պալատից նրանց հեռանալով սկիզբ է առնում մի հուզիչ հեքիաթ, որ պատմում է հայկական շուկայի գունագեղ թատերախումբը: Արքայազունները հանդիպում են խելացի ձիուն, գիշատիչ հրեշների եւ առեղծվածային սեւ թագավորին…
Ինչպես նշվել է blick.de կայքէջում տեղ գտած հոդվածում, «Հազարան բլբուլ» նախագիծը սրտի գործ է Հայաստանի մայրաքաղաքում ծնված, Երեւանի կոնսերվատորիայի շրջանավարտ, հայ մոր եւ գերմանացի հոր որդի Վլադիմիր Յասկորսկու համար, որը հայկական գունեղ երգերից ու պարերից երաժշտական մի զվարճալի հեքիաթ է կերտել երեխաների համար: Բեմադրությունը հանդիսատեսին ծանոթացնում է Գերմանիայում գրեթե բոլորովին անծանոթ հայ ժողովրդական հեքիաթների աշխարհի, այլեւ հայ ավանդական երաժշտության հետ (Սայաթ-Նովա, Կոմիտաս Վարդապետ, Ալեքսանդր Սպենդիարյան եւ այլք), որ բեմադրության մեջ տեղ-տեղ հնչում էր հայերեն եւ հայկական գործիքներով: Գլխավոր դերում հանդես է եկել հանդիսատեսի սիրելի բարիտոն Սեբաստիան Զայցը, որը մարմնավորել է թագավորի ամենափոքր որդի Ալո Դինոյին:
Ա. Բ.
