«Ազգ»ի տեղեկություններով, «Թեղուտ» ՓԲԸ-ն անորոշ ժամանակով դադարեցնում է աշխատանքները: Աշխատակիցները մեզ հետ զրույցում հայտնեցին, որ ՓԲԸ-ի ղեկավարներն իրենց տուն են ուղարկել: Հարկադիր պարապուրդի մատնված թեղուտցնիներն ու հարակից բնակավայրերի գյուղացիները խիստ անհանգստացած են՝ մի քանի գյուղերի աշխատանքով, հետեւաբար նաեւ օրվա հացով ապահովող հանքի չաշխատելն ու 2/3-ով վարձատրելը խիստ բացասական է անդրադառնալու կենսակերպի վրա:
Տեղացիները մեզ փոխանցեցին նաեւ, որ հանքի տնօրենությունն աշխատակիցներին ասել է, թե հարկադիր պարապուրդը նախնական մոտ տասն օրով են հայտարարում:
«Ասում են, թե Ամերիկան Ռուսաստանի հանդեպ պատժամիջոցներ է սահմանել, հանքանյութի արտահանման խնդիր է առաջացել, հետեւաբար գործունեությունն անորոշ ժամանակով պետք է դադարեցնել: Լավ է գոնե՝ վստահեցրել են, որ 2/3-ի չափով վարձատրվելու են»,- նշեցին թեղուտցիները:
Հանքի աշխատանքների դադարն, իսկապես, Ռուսաստանի նկատմամբ կիրառվող սանկիցիաների հետ է կապված, քանի որ «Թեղուտի» սեփականատերերի մեջ երրորդ բաժնետերը Կիրպոսում գրանցված Nairi Infrastructure Capital Ltd-ն, ինչից էլ սկսվում է «ՎՏԲ բանկ»-ի դուստր ընկերությունների շղթան եւ հասնում մինչեւ ռուսաստանյան «ՎՏԲ բանկ» ՓԲԸ-ին:
Հանքը, հիշեցնենք, «Վալլեքս» ընկերությունն էր հիմնադրել: Այն շահագործելու համար 380 մլն դոլարի վարկ էր վերցրել ՎՏԲ բանկից: Ընկերությունը սակայն այն մարել չէր կարողացել, դրան գումարվել էին չվճարած տոկոսադրույքների գումարներն ու գործարար Վալերի Մեջլումյանին պատկանող հանքավայրը բանկը պարտքի դիմաց իրենով էր արել:
ՍԵՎԱԿ ՎԱՐԴՈՒՄՅԱՆ
