Օրեր առաջ տեղի ունեցավ «Երեւանյան հեռանկարներ» եւ «Հայա» երաժշտական փառատոնների հիմնադիր Սոնա Հովհաննիսյանի մամուլի ասուլիսը: «Հայա» փառատոնի շնորհիվ Հայաստանը վերջին ժամանակներում գտնվում է միջազգային ուշադրության էպիկենտրոնում, քանի որ շուտով մեր երկրում համերգային ծրագրերով հանդես են գալու համաշխարհային հռչակ վայելող այնպիսի աստղեր, ինչպիսիք են 50 Cent-ը, Zaz-ը, Led Zeppelin Symphonic-ը: Պատասխանելով լրագրողների հարցերին, Հովհաննիսյանը նշեց, որ «Հայա» փառատոնը ցանկանում է նոր էջեր բացել երկրի տնտեսության, մշակույթի եւ այլ ոլորտների համար: Հայտնի են նաեւ երգիչների համերգների օրերը:
Առաջին ելույթը կունենա ֆրանսիացի երգչուհի Zaz-ը՝ հունիսի 25-ին, հուլիսի 1-ին ռեփեր 50 Cent-ը,ով Հայաստանում կլինի իր ամբողջ թիմով, իսկ հուլիսի 9-ին Led Zeppelin Symphonic-ը: Հովհաննիսյանը նշեց, որ ընտրել են այնպիսի աստղեր, որոնք վայելում են հասարակության ճանաչումն ու սերը եւ կարող են ապահովել 40, 50, 60 հազարից ավել հանդիսատես: Թեեւ նախնական տվյալներով երգիչները Հայաստանում մնալու են 2 օր (ներառյալ համերգի օրերը), Սոնան հայտնեց, որ նրանք, կախված մեր վերաբերմունքից եւ արտաքին գործոններից, իրենց այցը կարող են անժամկետ երկարաձգել:
Փառատոնի նպատակներից մեկն այն է, որ երգիչները հաճախ այցելեն Հայաստան, տեսահոլովակներ նկարեն այստեղ եւ դրանով նպաստեն Հայաստանի ճանաչմանն ու զբոսաշրջության աճին: Փառատոնի շրջանակներում Հայաստան կայցելեն ոչ միայն երաժշտասերներ տարբեր երկրներից, այլեւ կլինեն «աստղային» հյուրեր: Համերգները նախատեսվում է իրականացնել «Հրազդան» մարզադաշտում, որտեղ հիմա թեժ աշխատանքներ են կատարվում՝ մանրակրկիտ մաքրումից մինչեւ վերանորոգում: Հովհաննիսյանը հավելեց, որ իրենք առաջին կառույցն են, ովքեր մարզադահլիճը դիտարկել են որպես համերգային հարթակ: Տոմսերի վաճառքը սկսվել է մայիսի 3-ից: Հայաստանում, ինչպես նաեւ արտասահմանում տոմսերի վաճառքն աննախադեպ աճ է գրանցում: Ներկայումս չունեն աջակցություն պետությունից, բայց Հովհաննիսյանը վստահեցրեց, որ իրենց նախաձեռնությունն այնպիսին է, որ ինչ-որ կետում անպայման լինելու է կառավարության եւ իրենց համագործակցությունը:
Ասուլիսի վերջում փառատոնի հիմնադիրը տեղեկացրեց հաջորդ հանդիպման մասին, որը կկայանա հենց մարզադաշտում՝ հետագա հարցերի պատասխանները ստանալու, կատարված աշխատանքները տեսնելու եւ գնահատելու համար:
ԱՆՆԱ ՀԱՐՈՒԹՅՈՒՆՅԱՆ
