Այս տարվա սեպտեմբերից «Եկեղեցու պատմություն առարկան» նոր ձեւով կդասավանդվի: ԿԳՄՍ նախարարության որոշմամբ՝ դպրոցը պետք է որոշի՝ այժմ գործող մոդելո՞վ շարունակել ուսուցանել առարկան, թե՞, այնուամենայնիվ, նախարարության կողմից մշակված նոր չափորոշիչներով առաջնորդվել: Իսկ նոր չափորոշիչներն առարկայի տարրալուծում կամ ինտեգրում է նշանակում մի քանի առարկաների մեջ՝ «Հայոց պատմության», «Արվեստի», «Հասարակագիտության» եւ այլն: Թեեւ նախարարությունը, թվում է, դպրոցին ընտրելու հնարավորություն է տվել, բայց Եկեղեցու պատմության դասավանդմամբ մտահոգված անձինք կասկածում են, որ «հայեցողական» սկզբունքը, ներքին հրահանգի ուժով, պարտադիր կարող է դառնալ, ու բացառությամբ մեկ-երկու դպրոցի՝ բոլորը նոր մոդելին կանցնեն: Այդպիսով, փաստորեն, դպրոցներում մոտ 20 տարի առաջ ներդրված առարկան պատմություն կդառնա:
Բյուրականի սուրբ Հովհաննես եկեղեցու հոգեւոր հովիվ տեր Վրթանես քահանա Բաղալյանը ներքին համոզում ունի, որ առարկան դպրոցական ծրագրերից հանելով՝ նախարարությունը պատվեր է կատարում: Թե ինչ պատվերի մասին է խոսում, հոգեւորականը չի ցանկանում մանրամասնել, համենայնդեպս, ընգծում է, որ առարկայի կարեւոր՝ բարոյաբանական հարցերն են, որ դուրս են մնում: «Ազգ»-ի հետ զրույցում նշում է՝ եթե «Եկեղեցու պատմության» չոր, թվագրական տվյալներն իսկապես «Պատմության» մեջ են ներառվել, ապա հոգեւոր արժեքների, խրատական ու բարոյական բնույթի ուսուցողական նյութերն առհասարակ դուրս են մղվել: «Աշակերտը չի ուսումնասիրելու եւ սովորելու, թե ինչ ասել է բղջախոհությունը, խոհեմությունը, հպարտությունն ու վեհանձնությունը: Բայց սրանք բոլորը բարոյաբանական հարցեր են, որ մեր եկեղեցու անքակտելի մասն են կազմում: Չի կարելի հենց այնպես, բռնել, կտրել, կտրտել ու ասել՝ սա է ծրագիրը»,- նեղսրտում է հոգեւորականը:
Առարկայի ճակատագիրը որոշելիս, ըստ տեր Վրթանեսի, ԿԳՄՍ-ն համապարփակ ու լուրջ քննարկումներ չի անցկացրել, միանձնյա, առանց հասարակության կարծիքն իմանալու է որոշել, թե ինչ կարելի է անել առարկայի հետ: «Իսկ արածը, մեղմ ասած, ճիշտ չէ: Նույն քննարկումները, եթե կհիշեք, նաեւ 2019-ին առաջ եկան, բայց այն ժամանակ երկար, մի քանի ամիս տեւողությամբ քննարկումներ տեղի ունեցան, ինչի ժամանակ պարզվեց, որ հասարակության հիմնական մասը կողմ է, որ առարկան դասավանդվի դպրոցում: Մեր հասարակությունն, այո, տարբեր հարցերի շուրջը տարակարծիք է, բայց այս հարցի մասով, հաստատ, մարդկանց ավելի քան 50 տոկոսը կողմ է, որ առարկան շարունակվի դասավանդվել: Հասարակությունը, գուցե, շատ ավելի միասնական տեսակետ ունի ԿԳՄՍ նախարար Ժաննա Անդրեասյանին պաշտոնանկ անելու, բայց ոչ առարկան դպրոցական ծրագրից հանելու հարցում»,- ամփոփում է մեր զրուցակիցը»:
ՍԵՎԱԿ ՎԱՐԴՈՒՄՅԱՆ
