Օգոստոսի 22-ից բալետի նշանավոր պարող եւ պարուսույց Դավիթ Կարապետյանը իր աշխատանքն է սկսել որպես Ֆիլադելֆիայի (ԱՄՆ) բալետի դպրոցի տնօրեն: Մինչ այս առաջատար դպրոցին միանալը նա հինգ տարի աշխատել է որպես Փենսիլվանիայի բալետի ակադեմիայի գեղարվեստական ղեկավար, իսկ դրանից առաջ 12 տարի եղել է Սան Ֆրանցիսկոյի բալետի գլխավոր պարող:
«Մենք ոգեւորված ենք՝ Դավիթին Ֆիլադելֆիայի բալետում ողջունելով,- ասել է «Փենսիլվանիա բալեի» գեղարվեստական տնօրեն, բալետի նշանավոր պարող Անխել Կորելլան:- Իր կարիերայի ընթացքում Դավիթը մշտապես աչքի է ընկել թե՛ որպես կատարող, թե՛ որպես բալետի հաջորդ սերնդի ուսուցիչ: Նրա փորձի լայն շրջանակը, գիտելիքների խորությունը եւ բալետային կրթության հանդեպ կիրքը նրան դարձնում են կատարյալ անձնավորություն՝ դպրոցը համարձակորեն դեպի ապագա առաջնորդելու համար»:
Երեւանի պարարվեստի ուսումնարանի սան Դավիթ Կարապետյանը վերապատրաստվել է Շվեյցարիայում՝ Ցյուրիխի Բալետի դպրոցում եւ Պարի ակադեմիայում: Վեց տարի որպես մենակատար հանդես է եկել Ցյուրիխի բալետում: Կարապետյանը բազմաթիվ միջազգային մրցանակների եւ պատվոգրերի դափնեկիր է: Նա հայ բալետի մրցույթի ոսկե եւ արծաթե մեդալների դափնեկիր է, 1999 թվականի Լոզանի հեղինակավոր բալետի մրցույթի հաղթող: 2006-ին ապագա կնոջ՝ պարուհի Վանեսա Զահորիանի հետ ԱՄՆ բալետի միջազգային մրցույթում հաղթել է «լավագույն զուգապար» կատեգորիայում, եղել նաեւ Այսեդորա Դունկանի մրցույթի մրցանակակիր՝ անսամբլային լավագույն կատարման համար: Կարապետյանի՝ 2015 թվականին իրականացրած Հայոց ցեղասպանության մասին «Մեռան, որ ապրինք» խորեոգրաֆիկ ֆիլմն արժանացել է «Էմմի» մրցանակի՝ Հեռուստատեսային արվեստների եւ գիտությունների ազգային ակադեմիայի Սան Ֆրանցիսկոյի մասնաճյուղի կողմից: Նրա բազմաթիվ գլխավոր դերերից են Արքայազնը եւ Ձյան թագավորը («Մարդուկ-Ջարդուկը»), Զիգֆրիդը («Կարապի լիճը»), Ալբերտը («Ժիզել»), Ռոմեոն («Ռոմեո եւ Ջուլիետ»), Օնեգինը («Օնեգին»), Բազիլը («Դոն Կիխոտ»): Գլխավոր դերեր է կատարել նաեւ Ջորջ Բալանչինի ստեղծագործությունների բեմադրություններում՝ «Ադամանդներ», «Սուտակներ», «Դիվերտիսմենտ թիվ 15», «Չորս տարերք», «Շոտլանդական սիմֆոնիա»: Դավիթ Կարապետյանը նկարահանվել է PBS հեռուստաընկերության բալետային ֆիլմերում, այդ թվում՝ Հելգի Թոմասոնի «Մարդուկ-Ջարդուկը» (Արքայազն, 2008), Ջոն Նոյմայերի «Փոքրիկ ջրահարսը» (Ծովային կախարդ, 2011), Հելգի Թոմասոնի «Ռոմեո եւ Ջուլիետ» (Ռոմեո, 2015): Դավիթ Կարապետյանը 2018-ին եղել է Լոզանի մրցանակի ժյուրիի կազմում, որպես հրավիրյալ ուսուցիչ աշխատել Սան Ֆրանցիսկոյի, Բոսթոնի, Ֆիլադելֆիայի եւ այլ բալետային խմբերի հետ: Հանդես է եկել նաեւ Երեւանի օպերայի եւ բալետի թատրոնում:
Ա. Բ.
Լուսանկարը՝ Ալեքսանդր Ռենեֆ–Օլսոնի
