Արցախի Հանրապետության ջրամատակարարման զարգացման համար կարեւոր նշանակություն ունի Պատարայի ջրամբարի կառուցումը:Աշխատանքներ են կատարվում Կարկառ գետի ջրերը դաշտերն ու այգիները հասցնելու համար: Ջրատար խողովակներով գետի ջրերը հասցվել են Վարդաձոր, Նախիջեւանիկ եւ Սառնաղբյուր գյուղեր:
Պատարայի ջրամբարի կառուցման նախագծանախահաշվային բոլոր փաստաթղթերը պատրաստ են: Այն շահագործելու պարագայում Ստեփանակերտն ամբողջությամբ կապահովի շուրջօրյա խմելու ջրով: Խմելու եւ ոռոգելի մշտական ջուր կունենան նաեւ Ասկերանի շրջանի մի շարք գյուղական համայնքներ:
Պատարայի ջրամբարի շինարարությունը իրականացվելու է երեք փուլով եւ շահագործումը նախատեսվում է 2025թ.ին: Ծրագիրը նախագծված էր դեռ 2007-ից: Ջրամբարում պետք է ամբարվեր 4 միլիոն խորանարդ մետր ջուր: Ջրի նկատմամբ պահանջը մեծանալու պատճառով այժմ պատրաստել են նոր նախագիծ: Ջրամբարի ծավալը կընդլայնվի մինչեւ 6 միլիոն խորանարդ մետր: Նախագծի ջրատարի հատվածը մոտ 22 կիլոմետր է: Մայր ջրատարի շինարարությունն ավարտման փուլում է: Շինարարությունը կատարվում է արագ տեմպերով: Ջրամբարի շինարարությունը կավարտվի երեք տարի հետո: Այն հնարավորություն կտա Ստեփանակերտից բացի բարելավել նաեւ Մարտունի քաղաքի ջրամատակարարումը:
Պատվարի հատակի նիշը 902 մետր է, կատարինը՝ 955 մետր: Պատվարի բարձրությունը 53 մետր է, որից ջրի առավելագույն բարձրությունը՝ 51 մետր: Այդ դեպքում ջրամբարի հայելու մակերեսը կազմում է 40 հեկտար:
Պատարայի ջրամբարը Արցախի անկախության տարիների ամենամեծ տնտեսական ծրագիրն էր: 22 կիլոմետրանոց խողովակաշարի անցկացման համար ծախսվել է հինգ միլիարդ դրամ: Խողովակաշարը Պատարա գետից ձգվում է Ստեփանակերտ՝ ջուր մատակարարելով ավելի քան 10 բնակավայրի եւ ոռոգելով 2500 հեկտար տարածք:
Հիշեցնենք, որ սկզբնապես նախատեսված էր ջրամբարը օգտագործել միայն գյուղատնտեսական նպատակով:
Ստեփան ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
