Նոյեմբերի 6-ին Ալ. Սպենդարյանի անվան օպերայի եւ բալետի ազգային ակադեմիական թատրոնում տեղի ունեցավ Հայկական պետական մանկավարժական համալսարնի 100-ամյակին նվիրված հոբելյանական համերգը:
100-ամյա բուհի հյուրերն էին ՀՀ վարչապետ Նիկոլ Փաշինյանը, ԿԳՄՍ նախարար Վահրամ Դումանյանը, փոխնախարար Ժաննա Անդրեասյանը, կառավարության անդամներ, համալսարանի պրոֆեսորադասախոսական կազմը եւ ուսանողներ:
«Մենք այս տարեգրության էջերը թերթում ենք սրբազան ակնածանքով ու պատասխանատվության բարձր գիտակցմամբ: Մեր ժողովրդի ընդահանուր պատմության մեջ բուհի կենսագրությունը մի մասունք է, որտեղ ամփոփված է մեծ մտավորականների տարբեր սերունդների գիտական մտքի արգասիքը»,- իր խոսքում նշեց ՀՊՄՀ ռեկտոր Սրբուհի Գեւորգյանը: Նա համալսարանի հոբելյանը լավ առիթ է համարում արժևորելու բարձրագույն կրթօջախի տարեգրությունը կերտած երախտավորներին, մատնանշելու ուսուցչի պատվավոր առաքելությունն իրականացնող շրջանավարտների տարբեր սերունդների ներդրումը:
ԿԳՄՍ նախարարը ելույթի ժամանակ շնորհավորելով մեկդարյա համալսարանի հոբելյանը՝ նշեց, որ Մանկավարժականն այն բացառիկ բուհերից է, որ հավատարիմ է մնացել իր ակունքներին: Նախարարն ընդգծեց՝ բուհի անցած ճանապարհը եղել է բարդ, դժվարին, բայց պատվաբեր: Նա շեշտեց, որ վերջին շրջանում կարեւորվում է մանկավարժական կրթության դերը:
«Բազմիցս հնչել են կարծիքներ, որ յուրաքանչյուր խնդրի հիմքում կրթությունն է: ՀՀ կառավարությունը ջանք չի խնայում եւ կրթության զարգացման ռազմավարական ծրագրում ահռելի մաս է հատկացված հենց մանկավարժական բարձրագույն կրթությանը»,- ասաց Վահրամ Դումանյանը, ապա շնորհակալություն հայտնեց բուհի մանկավարժ-երախտավորներին:
Վարչապետը բուհի հոբելյանը լավ առիթ համարեց կատարված աշխատանքն ամփոփելու. «Համոզված եմ, որ կկարողանանք այսօր նախագծել, իսկ վաղը իրագործել ազատ, երջանիկ ու անվտանգ Հայաստանի այն ապագան, որ պիտի կերտվի մանկավարժական կրթության ոլորտում»,- իր հերթին նշեց Նիկոլ Փաշինյանը:
100-ամյա բուհի հոբելյանն ուղեկցվեց պարգեւատրումներով. գիտության եւ կրթության զարգացման գործում ներդրած ավանդի համար Արարատ Ղարիբյանի անվան հայոց լեզվի եւ նրա դասավանդման մեթոդիկայի ամբիոնի պրոֆեսոր Լալիկ Խաչատրյանը պարգեւատրվեց «Մովսես Խորենացի» մեդալով, մատաղ սերնդի ուսուցման եւ դաստիարկության գործում վաստակի համար ՀՊՄՀ Ուսումնագիտական հարցերով պրոռեկտոր Նաիրա Սաֆարյանին շնորհվեց ՀՀ վաստակավոր մանկավարժի պատվավոր կոչում, գիտության եւ կրթության զարգացման գործում ներդրած ավանդի համար ՀՀ վարչապետի հուշամեդալով պարգևատրվեցին Հայ հին եւ միջնադարյան գրականության եւ նրա դասավանդման մեթոդիկայի ամբիոի վարիչ, պրոֆեսոր Աելիտա Դոլուխանյանը ու Կենսաբանության, քիմիայի եւ նրանց դասավանդման մեթոդիկայի ամբիոնի պրոֆեսոր Մեժլում Երիցյանը:
Երկարամյա անբասիր աշխատանքի համար ՀՀ վարչապետի շնորհակալագրով պարգևատրվեցին Հայոց պատմության ամբիոնի վարիչ, պրոֆեսոր Աշոտ Փիլիպոսյանն ու Մաթեմատիկայի եւ նրա դասավանդման մեթոդիկայի ամբիոնի պրոֆեսոր Ալեքսանդր Ղուշչյանը:
Համերգ-հանդիսությանը իրենց ելույթներով հանդես եկան «Բերդ» պարային անսամբլը, Երգի պետական թատրոնը, ՀՊՄՀ-ի Պարարվեստի մանկավարժության բաժնի ուսանողները, Մնջախաղի թատրոնը, Կամո Սեյրանյանը եւ Ալ. Սպենդարյանի անվ. օպերայի եւ բալետի ազգային ակադեմիական թատրոնի սիմֆոնիկ նվագախումն ու երգչախումբը:
Հանդիսությունն ավարտվեց համալսարանի պարարվեստի ուսանողների պարային բեմադրությամբ, որի միջոցով ներկայացվեցին համալսարանի տարբեր ֆակուլտետներն իրենց յուրահատկություններով:
Շուրջ 100 տարի Մանկավարժական համալսարանը սովորեցնում է սովորեցնել:
ՀԱՍՄԻԿ ՄԽԻԹԱՐՅԱՆ
