Դեկտեմբերի 9-ին Ալմաթըի Հանրապետության պալատում մեծ հաջողությամբ կայացել է «Շնորհակալ եմ քեզ…» վերտառությամբ համերգը՝ նվիրված Առնո Բաբաջանյանի ստեղծագործությանը: Ալմաթըի Ակիմի անվան էստրադային սիմֆոնիկ նվագախմբի արտիստները Ալեքսանդր Բելյակովի ղեկավարությամբ ներկայացրել են համերգային մեծ ծրագիր՝ կազմված Առնո Բաբաջանյանի ստեղծագործություններից: Հայ կոմպոզիտորի երգերը կատարել են ղազախական էստրադայի աստղերը՝ Ռոզա Ռիմբաեւա, Նագիմա Էսկալիեւա, Օլեգ Տատամիրով, Իլյաս Աուտով, Իգոր Բլագոդարնի, Բաուըրժան Մուսին, «Դերվիշներ» եւ «Իլ կանտո» համույթները, «Առնո Բաբաջանյան» հիմնադրամի մենակատար, հայազգի Սուրեն Պլատոնովը Մոսկվայից եւ 17-ամյա ղազախ երգչուհի Էլգիզա Կարաժանովան:
«Առնո Բաբաջանյան» հիմնադրամի Ղազախստանի պաշտոնական ներկայացուցիչ Վահրամ Վարդանյանը Բաբաջանյանի երաժշտության պահպանման եւ ժողովրդականացման համար կոմպոզիտորի 100-ամյակին հիմնված հուշամեդալներ եւ պատվո դիպլոմներ շնորհեց Ռոզա Ռիմբաեւային, Նագիմա Էսկալիեւային, Ալեքսանդր Բելյակովին եւ Ալմաթըի «Ալ ջազ սիմֆոնի» նվագախմբին:
Երեկոյի ավարտին հնչել է «Առնո Բաբաջանյանի վերջին երգը»՝ Ռոբերտ Ռոժդեստվենսկու բանաստեղծությունների հիման վրա, բոլոր մասնակիցների կատարմամբ:
Ա. Բ.
