Ամերիկաբնակ նկարչուհի, մանկավարժ, մանկավարժական գիտությունների թեկնածու Անուշ Բաբայանն հունիսին արժանացել է Միլանի «Լեոնարդո դա Վինչիի միջազգային մրցանակին» իր «Ցնցումայնություն» կտավի համար: Նրա արվեստին իտալացիները ծանոթացել էին «Ժամանակակից արվեստի հավաքորդներ» կայքին տված հարցազրույցի շնորհիվ, որի հեղինակները 2024-ին սոցցանցերում ուսումնասիրել էին արվեստագետների մասին տեղեկատվությունը եւ նրան շնորհել «Ժամանակակից համաշխարհային արվեստի վիրտուոզ» մրցանակը: Տարբեր մրցույթներում մրցանակակիր են դարձել Բաբայանի կտավներից երեքը՝ «Բանաստեղծի հոգին» (Նյու Յորքի «Արթ էնդ բիյոնդ» ամսագրի շապիկի մրցույթում), «Պահապան հրեշտակները» (ընդգրկվել է Հռոմում լույս տեսած «Ժամանակակից նշանավոր վարպետներ» պատկերագրքում) եւ «Տիեզերական Տիրամայրը» (տպագրվել է «Նոր հրաշալի վարպետներ Նյու Յորքում» պատկերագրքում): Իսկ «Լեոնարդո դա Վինչիի միջազգային մրցանակն» Անուշ Բաբայանին տրվել է հետեւյալ ձեւակերպմամբ. «Ի նշան տաղանդի եւ գեղարվեստական արժանիքների ճանաչման, որոնք ոգեշնչում եւ ամրապնդում են ժամանակակից ստեղծագործությունը»: «Ցնցումայնություն» կտավն ընդգրկվել է «Լեոնարդո դա Վինչիի միջազգային մրցանակի» հրատարակած պատկերագրքում:
Հայաստանի եւ մի շարք միջազգային նկարչական միությունների անդամ, Երեւանի Հայ-ռուսական համալսարանի դոցենտ Անուշ Բաբայանն ավարտել է Երեւանի պետական համալսարանի ռուսական բանասիրական ֆակուլտետը, մասնագիտական վերապատրաստումներ անցել Բելառուսում, Ռուսաստանում եւ Գերմանիայում:
Կրթամշակութային ակտիվ գործունեություն է ծավալել Մինսկում՝ նախաձեռնելով միջազգային ծրագրեր եւ հանդես գալով որպես բանախոս: Նկարչությամբ զբաղվում է 2012-ից՝ նախընտրելով հեռավորարեւելյան գեղանկարչական տեխնիկան: Ունեցել է շուրջ երկու տասնյակ անհատական ցուցահանդես Հայաստանում, Բելառուսում, Ռուսաստանում, ԱՄՆ-ում: Նրա նկարները հաճախ ուղեկցվել են մետաքսե շալերով՝ ստեղծված սեփական գեղանկարների մոտիվներով: Բաբայանը նաեւ թարգմանիչ է. հայերեն է թարգմանել Յանկա Կուպալայի սոնետները, ռուսերեն՝ հայ գրողներ Վարդգես Դավթյանի եւ Մարգարիտ Դերանցի գործերից:
Ա. Բ.
Լուսանկարում՝ Անուշ Բաբայան, «Ցնցումայնություն»
