Այսօրվանից Չեխիան մտցնում է արտակարգ դրություն. Կառավարությունը ավելացնում է ռազմական բյուջեն

Այսօրվանից՝ մարտի 4-ից, Չեխիայում կառավարության որոշմամբ արտակարգ դրություն է մտցվում։ Նախարարների կաբինետի նիստից հետո այս մասին լրատվամիջոցներին հայտնել է վարչապետ Պետր Ֆիալան։ Միջոցառումը պայմանավորված է Ուկրաինայում ծավալվող ռազմական գործողություններով, որի տարածք փետրվարի 24-ին ներխուժել են Ռուսաստանի Դաշնության զորքերը։

Ֆիալայի ասելով, խոսքը «միայն տեխնիկական պատճառների մասին է, որպեսզի կարողանանք գլուխ հանել փախստականների հոսքից»։ Չեխիայի քաղաքացիները չեն տուժի, վստահեցնում է վարչապետը։

Չեխիայում Ուկրաինայի տարածք ռուսական զորքերի ներխուժումից ի վեր, Չեխիայի զինված ուժերի այսպես կոչված ակտիվ ռեզերվի ստորաբաժանումներում զինվորագրվել ցանկացողների թիվը տասնապատկվել է։ Երկրի Գլխավոր շտաբի մամուլի խոսնակ Մագդալենա Դվորակովան «Պրավո» թերթին ասել է, որ փետրվարի 24-ից ի վեր բանակի հավաքագրման կենտրոններ կանչերի թիվը տասնապատկվել է։ Նախկինում օրական 5-ից 10 հոգի հետաքրքրվում էր ռեզերվային ակտիվ դասընթաց մեկ օրում անցնելու հնարավորության մասին։ Հայտնի է դարձել նաեւ, որ մոտ 300 չեխ դիմել է նախագահական պալատ՝ Ուկրաինա որպես կամավոր մեկնելու թույլտվություն ստանալու համար։ Կառավարությունը 1 միլիարդով ավելացրել է նաեւ երկրի ռազմական բյուջեն։

Մարտի 3-ին Պրահայում տեղի ունեցած մամուլի ասուլիսում Չեխիայի առեւտրի պալատի ներկայացուցիչները հայտնեցին, որ լիովին վերահսկում են աշխատաշուկան, եւ արդեն իսկ գրանցվել է, որ Չեխիայում բնակվող 200 հազար ուկրաինացիների 15 տոկոսը մեկնել է հայրենիք՝ մասնակցելու Ուկրաինայի համար մղվող մարտերին։ Իսկ դա նշանակում է, որ մոտ 30 հազար աշխատատեղ թափուր է մնացել։ Մասնագետների կարծիքով այդ աշխատատեղերը կարող են լրացվել նոր փախստականներով, կամ այն մարդկանց ընտանիքի անդամներով, որոնք եկել են Չեխիա՝ իրենց ամուսինների կամ հայրերի փոխարեն։ Նաեւ կառավարությանը առաջարկել են, որ այն բոլոր ուկրաինացիները, որոնք մինչեւ հիմա աշխատում էին ոչ օրինական դաշտում, նրանց նկատմամբ կիրառվի համաներում, խորհրդանշական գումար վճարեն եւ օրինականցնեն իրենց աշխատանքը եւ մնալու կարգավիճակը։ Հատուկ նշվում է հյուրանոցների տնօրենների ցույց տված մեծ աջակցությունը, որի շնորհիվ ուկրաինացի փախստականներին 3500 տեղ է հատկացվել տարբեր հյուրանոցներում։

Արդեն իսկ Չեխիայի սահմանները հատել են 25 հազարից ավելի փախստականներ, որոնց մի մասը միացել է իրենց ընտանիքիների անդամներին, մյուս մասը տեղավորվել հատուկ կացարաններում։

Պրահայի ինտեգրացիոն կենտրոնն էլ արդեն մշակել է չեխերեն- ուկրաիաներեն ամենաանհրաժեշտ բառերի զրուցարան եւ տարածել, որպեսզի փախստականները, որոնք այլ լեզուներ չգիտեն, կարողանան իրենց հետաքրքրող հարցերը պարզել։

«Մարդը կարիքի մեջ» /https://www.clovekvtisni.cz// կազմակերպությունը, որը ստեղծվել էր դեռեւս 1988 թվականին Սպիտակի երկրաշարժից հետո ցույց տված աննախադեպ օգնությունից հետո, այժմ էլ շարունակում է ֆինանսական աջակցություն ստանալ բնակչությունից եւ օգնել ուկրաինացի փախստականներին ։ Միայն երկու օր առաջ երկժամյա համերգի ընթացքում փոխանցվել էր 160 միլիոն կրոն։ Այս կազմակերպությունն է համակարգում Ուկրաինա ուղարկվող օգնությունը, եւ միայն իրենց միջոցով է հնարավոր օգնություն հասցնել ուկրաինական տարածքում գտնվող մարդկանց։

Կազմակերպությունը հիմնականում աշխատում է ուկրաինական Լվովում, Սլովակիայի, Մոլդովայի եւ Ռումինիայի սահմանների փախստականների ճամբարներում։

ՀԱԿՈԲ ԱՍԱՏՐՅԱՆ

Պրահա