Սիդնեյի օպերային թատրոնում հուլիսյան թատերաշրջանում Վերդիի «Տրավիատա» օպերայում Ֆլորայի դերում հանդես է գալիս մեցցո-սոպրանո Ագնես Սարգիսը: Ծնունդով իրանահայ Ագնեսն օպերայի բարձրագույն դիպլոմը ստացել է Սիդնեյի կոնսերվատորիայում 2011 թվականին, իսկ երաժշտության ավարտական դիպլոմը՝ 2012 թվականին: Հանդես է եկել նաեւ «Կարմեն», «Ուրախ այրին», «Մադամ Բաթերֆլայ», «Ֆիգարոյի ամուսնությունը», «Կախարդական սրինգը» օպերաներում եւ Սիդնեյի օպերային թատրոնում ներկայացված «Օպերային մեծ հիթեր» ծրագրում:
Ավստրալական aussietheatre.com կայքէջին տված հարցազրույցում Ագնես Սարգիսն ասել է, որ երաժշտությունը միշտ եղել է իր կյանքի մի մասը ծնողների շնորհիվ, որոնք թեեւ երաժիշտներ չեն, սակայն մանկուց իրեն ուղարկել են դաշնամուրի եւ վոկալի դասերի: Թեհրանում Ագնեսը ստացել է ճարտարագետի մասնագիտություն՝ միաժամանակ երգելով դասական երգչախմբում: Այնուհետեւ տեղափոխվել է Ավստրալիա եւ ուսումը շարունակել Սիդնեյի կոնսերվատորիայում:
«Ո՞րն է եղել ներկայացման մեջ աշխատելու ամենահետաքրքրական կողմը» հարցին Ագնեսը պատասխանել է. «Այս հիասքանչ օպերայի մի մասը լինելը, Սիդնեյի գեղեցիկ օպերային թատրոնի գլխավոր բեմում իմ զարմանահրաշ գործընկեր երգիչների կողքին երգելը, ինձ համար այս զարմանահրաշ զգեստները պատրաստելը եւ աշխարհի ամենահայտնի դիրիժորներից մեկի հետ աշխատելը»: Իսկ «ո՞րն է եղել աշխատանքի ամենադժվար պահը», երգչուհին պատասխանել է. «Այս դերերգը կատարելն այն բանից հետո, երբ մի քանի հրաշալի երգիչներ արդեն այնքան հիանալի կերպով հանդես էին եկել այս նույն բեմադրության մեջ: Ճիշտ է, յուրաքանչյուր երգիչ յուրովի է կատարում նույն դերը, բայց այն պետք է պարզապես կատարյալ լինի՝ թե՛ երգի մեջ, թե՛ դերասանական խաղի: Ինձ համար «Տրավիատայի» հիմնական ուղերձը զոհաբերության և իսկական սիրո մասին է», եզրափակել է հարցազրույցն Ագնես Սարգիսը:
Նշենք, որ ժամանակին Ագնես Սարգիս անուն-ազգանունով ֆրանս-ալժիրական ծագումով մի երգչուհի եղել է Ֆրանսիայում, որին սխալմամբ վերագրել են հայկական ծագում:
Ա. Բ.
