Վերջերս ՀՀ Շրջակա միջավայրի նախարարության եւ ՄԱԿ-ի արդյունաբերական զարգացման կազմակերպության (ՄԱԱԶԿ) կողմից համատեղ իրականացվող «Օզոնային շերտի պահպանություն» ծրագիրը Սառեցման, օդորակման եւ ջեռուցման ինժեներական հայկական ասոցիացիայի (ՍՕՋԻ) հետ համատեղ կազմակերպել է Սառնամատակարարման համաշխարհային օրվան նվիրված ամենամյա միջոցառում «Ինստիտուցիոնալ հզորացում եւ կարողությունների ստեղծում» ծրագրի շրջանակներում:
Հանդիպմանը մասնակցում էին ՀՀ շրջակա միջավայրի նախարարության կլիմայական քաղաքականության, միջազգային համագործակցության վարչությունների, ՄԱԱԶԿ հայաստանյան գրասենյակի, ՄԱԶԾ Գենդերային հավասարության պորտֆելի, Ստանդարտացման եւ չափագիտության ազգային մարմնի ներկայացուցիչներ, ՍՕՋԻ հայկական ասոցիացիայի խորհրդի անդամներ, Երեւանի թիվ 2 եւ Արմավիրի տարածաշրջանային պետական քոլեջների «Սառնարանային տնտեսություն» մասնագիտության դասախոսներ, «Վեգա Ուորլդ» ՍՊԸ-ի ու ոլորտային որոշ խոշոր ընկերությունների ներկայացուցիչներ եւ «Օզոնային շերտի պահպանություն» ծրագրի փորձագետներ:
Ողջույնի խոսքով հանդես եկած մասնահիցները շնորհավորելով միմյանց՝ իրենց երախտագիտությունը հայտնեցին սերտ համագործակցության եւ ձեռքբերումների համար՝ ընդգծելով, որ արձանագրված հաջողությունները բոլոր օղակների՝ սառնարանային ոլորտի հասարակական եւ բիզնես կազմակերպությունների, ոլորտային մասնագետների, միջին մասնագիտական կրթություն ապահովող քոլեջների տնօրենների եւ դասախոսների, Ստանդարտացման եւ չափագիտության ազգային մարմնի եւ պետական մյուս շահագրգիռ գերատեսչությունների գործընկերների հետեւողական աշխատանքի եւ նվիրումի արդյունքն են:
Օրվա խորհուրդը կրող հանդիպում-քննարկման ընթացքում անդրադարձ կատարվեց սառնամատակարարման ոլորտի դերին Երկիր մոլորակի կայունության հարցում եւ համաշխարհային տնտեսության մեջ, ստանդարտացման կարեւորությանը սառնամատակարարման ոլորտում, թափոն համարվող սառնարանային սարքավորումների վերամշակման մեթոդներին եւ վտանգավոր թափոնների նվազեցման ռազմավարությանը:
Միջոցառումն ամփոփվեց ճանաչողական այցով «Երեւանի գարեջուր» ՓԲԸ, որտեղ ոլորտի մասնագետները հնարավորություն ունեցան ծանոթանալու բնական սառնագենտով` ամոնիակով աշխատող սառնարանային սարքավորումների առավելություններին եւ դրանց կիրառման օրինակներին:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
