«Տնտեսական կատաստրոֆա է, ոչ թե բում»:
ՀՀ քաղաքացի
Օրեցօր սրվող սոցիալական խնդիրներին ու չնահանջող գնաճին զուգահեռ կառավարությունը «տնտեսական բումի» մասին է հաղորդում:
Հայաստանի տնտեսության մեջ այս տարվա առաջին կիսամյակում գրանցված աճի հետ մեկտեղ դրամատիկ կերպով աճում է նաեւ աղքատության ցուցանիշը: Ավելի շատ ապրանք ներմուծող, քան արտահանող Հայաստանում առաջին հիմնական սպառման ապրանքների գների նվազում այդպես էլ չարձանագրվեց: Սա հանգեցրեց գնողունակության՝ երկնիշ ցուցանիշով նվազման, ինչի ֆոնին տնտեսագետները աղքատության մակարդակի ավելացում են կանխատեսում:
Համաշխարհային բանկը, օրինակ, չի բացառում, որ Հայաստանում աղքատության մակարդակը կարող է հասնել 39,6%-ի, ինչը նշանակում է, որ ազգաբնակչության գրեթե ամեն երկրորդ քաղաքացին աղքատ է լինելու:
«Էլ ի՞նչ պետք է անեմ, որ աղքատ չլինեմ, մի օրվա մեջ 2-3 տեղ եմ աշխատում: Եթե այն ժամանակ մի փոքր էլի մատչելի էր, կարող էիր մի բան առնեիր ու հացի հետ տայիր երեխեքին, հիմա էդ էլ չես կարում »,- մեզ հետ զրույցում ասում է 3 անչափահաս երեխաների մայր Արմինեն:
Տնտեսագետ Պարսյանի խոսքով` սննդամթերքի միջազգային գների բարձրացումն, իհարկե, ազդել է հայաստանյան գների վրա, սակայն երկրում շարունակվող թանկացումների պատճառը նաեւ գյուղոլորտում կառավարության ձախողված քաղաքականությունն է: Նշենք, որ գյուղոլորտն այս տարի 9 ամիսների հաշվարկով գրանցել է 1.5% անկում, եւ այս անկումն էական ազդեցություն է թողել նաեւ սննդամթերքի գների վրա:
«Միս ընդհանրապես չեմ առնում, որ առնեմ հետո մեր դեղերին էլ փող չի մնա»,- ասում է 78-ամյա տիկին Մանուշակը, որը ամսական շուրջ 40 հազար դրամ թոշակ է ստանում:
Տարեց կինը սրտնեղում է ասելով. «Այսպիսի բարձր գնաճի պայմաններում 3 հազար դրամով բարձրացրին թոշակն ու նպաստը: Իսկ թե թանկացումների հետեւանքով քանի՞ այդպիսի 3 հազար դրամով է ավելացել թոշակառուի ու նպաստառուի ծախսը, մնաց ստվերում, ոչ մեկը դրա մասին չի խոսում»:
Հայաստանցիների գրպանին շարունակաբար հարվածող գնաճը պաշտոնական կանխատեսումներով առաջիկայում չի նահանջելու: Իշխանությունների հայտարարած «տնտեսական բումը» քաղաքացիների կողքով է անցնում միայն:
Երկու տարվա ընթացքում ոչ պարենային ապրանքների համախառն գնաճը հասնում է 18 %, ինչը պարենային ապրանքների շուկայի ավելի քան 29% թանկացումների հետ միասին իր ուղղակի ազդեցությունն է թողնում մարդկանց սոցիալական վիճակի վրա:
Այսպիսի թանկացումներից հետո կառավարությունը թոշակներն ու նպաստները 3 հազար, իսկ նվազագույն աշխատավարձը 7 հազար դրամով ավելացնելով փորձում է ցույց տալ, թե սոցիալական խնդիր է լուծում, մինչդեռ դրանով նույնիսկ գնաճի կեսի ազդեցությունը չի ծածկվում:
ՀԱՍՄԻԿ ԱՎԵՏԻՍՅԱՆ
