Խոսքն իհարկե գազային գործարքի մասին է, որ պատմական են որակում գերմանական ԶԼՄ-ները, մասնավորապես «Բեռլիներ ցայթունգը» չորեքշաբթի ծանուցելով, թե ԳԴՀ-ն առաջին անգամ գազ է ստանում Ադրբեջանից: Բեռլինում գործող գազ ներկրող Զեֆե(Sefe) ընկերությունը Ադրբեջանի հետ 10 տարվա պայմանագիր է կնքել, իսկ Բեռլինում Բաքվի դեսպանատունը տոնում է մատակարարումների կրկնապատկումը: Մինչ այս գործարքը, Բաքուն գերմանական շուկայում գազի մատակարարման անմիջական դերակատար չի եղել: Չնայած Uniper-ը գազ է գնում Ադրբեջանից 2019- ից ի վեր, սակայն այդ մատակարարումները ցայժմ հոսել են հիմնականում դեպի Հարավային Եվրոպայի շուկաներ՝ Իտալիա, Հունաստան, Բուլղարիա՝ առանց գերմանացի հաճախորդներին հասնելու: Երեւի սա էր գինը, որ Շթայնմայերը ապրիլի սկզբին Երեւանից Բաքու, ապա Բեռլին հասնելով իր կայքից ջնջեց հայոց երկու խորհրդանշական վայրից՝ Ծիծեռնակաբերդ եւ Մայր աթոռ այցի լուսանկարները:
ԱՆԱՀԻՏ ՀՈՎՍԵՓՅԱՆ
Գերմանիա
Լուսանկարը՝ «Բեռլիներ ցայթունգ»-ի
