Աթաթյուրքի անվ. համալսարանի պրոֆեսոր Մեհմեթ Իշիքլիի գլխավորած հնագետների արշավախմբին հաջողվել է Վանա լճի մերձակայքում գտնվող ուրարտական Այանիս (՞) ամրոցում հայտնաբերել շուրջ 2700 տարվա հնությամբ բրոնզե վահաններ ու մեկ սաղավարտ, հաղորդել է Թուրքիայի մշակույթի եւ զբոսաշրջության նախարար Մեհմեթ Նուրի Էրսոյի անունից տարածված հաղորդագրությունը, որը հրապարակվել է «Նյուզուիք» եւ միջազգային այլ պարբերականներում:
Պրոֆ. Իշիքլիի կարծիքով, հայտնաբերված սաղավարտը, դատելով դրա զարդարուն փորագրություններից, օգտագործվել է ուրարտական ռազմի աստված Խալդիին նվիրված պաշտամունքային արարողությունների ընթացքում:
Ինչ վերաբերում է 30-ից ավել վահաններին, Իշիքլիի կարծիքով դրանք պատկանել են ուրարտական թագավորական ընտանիքին կամ էլիտար ռազմիկների մի խմբի:
Գտածոները հայտնաբերվել են երկրաշարժից կործանված ամրոցի ստորին հարկերից մեկում:
Խմբ. կողմից.– Կարծում ենք՝ այս տեղեկությունը կհետաքրքրի մեր ուրարտագետներին, եւ հույս ունենք, որ հետագայում հավելյալ տեղեկություններ կստանանք այս, ինչպես նաեւ Այանիս (Ayanis) ամրոցի անվան մասին, որը, թվում է, աղավաղված-թրքացված ձեւն է Վանի թագավորության ուրարտահայկական տեղանվան:
