«Զարհուրելի, սոսկալի օրեր են ապրում հատկապես մեր սերնդակիցները, որ ժամանակակիցն են Արցախի Հանրապետության եւ ընդհանրապես»: «Ազգ»-ի հետ զրույցում ասում է Հայաստանի «Դեմոկրատական» կուսակցության փոխնախագահ Նարինե Դիլբարյանը՝ մեկնաբանելով Արցախի տեղեկատվական շտաբի այն հայտարարությունը, թե Արցախի Հանրապետությունը դադարում է գոյություն ունենալ:
«Ադրբեջանի ոստիկանությունն արդեն Ստեփանակերտում է, ու պարզ է, թե նրանք այնտեղ ինչ կարող են անել: Այնտեղ ասելով նկատի ունեմ Արցախում մնացած երկու փոքրիկ բնակավայրերը՝ Ստեփանակերտն ու Ասկերանը, որտեղ բարձրացնելու են ադրբեջանական դրոշը: Եվ պարզ է, որ Արցախի ռազմաքաղաքական ընտրանին՝ մարդիկ, որոնք պաշտոններ են զբաղեցրել, մեծ դերակատարում են ունեցել Արցախի ինքնուրույն գոյության կայացման մեծ ճանապարհին, կանգնած են այն նույն վտանգի առջեւ, ինչ Ռուբեն Վարդանյանը»:
ՀՀ վարչապետ Նիկոլ Փաշինյանի՝ կառավարության նիստում արած հայտարարությանը, ՝ թե առաջիկայում Արցախում հայ բնակչություն չի մնալու, ճշտող հարց է տալիս. «Այդ հայ բնակչությունը, նաեւ Արցախի Հանրապետության պատմության կերտող ռազմաքաղաքական ընտրանին, որ չի մնալու ԼՂՀ-ում, նրա զգալի մասը մահվանն ընդառաջ հայտնվելու է Բաքվի բանտերո՞ւմ, թե՞ մենք կարողանալու ենք բռնի տեղահանման գործընթացը հասցնել ավարտին եւ նախապատրաստվել սարսափելի մյուս սցենարներին»:
Իսկ սցենարները, ըստ մեր մեկ այլ բանախոսի՝ ՀՀ Ազգային ժողովի պատգամավոր Գառնիկ Դանիելյանի, հետեւյալն է՝ ադրբեջանցիները հերթով մտնելու են բոլորի տները, հերթով ձերբակալելու եւ ադրբեջանական բանտեր են տանելու բոլոր այն հայրենասերներին, նվիրյալ մարդկանց, որոնց համար հայրենիքը թանկ է:
«Բոլորիս համար օր առաջ սթափվելու, լրջանալու, համախմբվելու, բոլոր տարաձայնությունները, բոլոր խնդիրները, մեկը՝ մյուսին սիրել-չսիրելը թողնում ենք մի կողմ: Արցախը հայաթափվում է: Արդեն 48 հազար մարդ հատել է Արցախի սահմանը: Մարդիկ թողել են իրենց տուն-տեղը եւ ընդամենը հագի շորերով տեղափոխվել Հայաստան: Հիմա հայրենասեր մարդիկ այնտեղ են ձերբակալվում ադրբեջանցիների կողմից, իսկ վաղը Հայաստանում նույնպես տեղի են ունենալու ձերբակալություններ»,- «Ազգ»-ի հետ զրույցում նշում է պատգամավորը:
Ինչ վերաբերում է Ռուբեն Վարդանյանին առեւանգելու եւ նրան պատանդի կարգավիճակում պահելու մասին, մեր զրուցակիցն ընդգծում է՝ դա իշխանությունների հետ համատեղ գործողությունների մի մասն է: «Իսկ այն մարդկանց, որոնք պայքարել են, կյանքը, առողջությունը դրել հայրենանվեր գործի վրա, ադրբեջանցիներն իրենց ցուցակներով ձերբակալում են: Նրանք տարվում Ադրբեջան՝ հայտնի բանտեր, որտեղ տեղեր են պատրաստվում Արցախում կենաց-մահու կռիվ տված բոլոր հայտնի հայրենասեր հայերի համար»,- հավելեց մեր զրուցակիցը:
ՍԵՎԱԿ ՎԱՐԴՈՒՄՅԱՆ
