Բելգիայում մի խումբ քուրդ լրագրողների հիմնած «Հավար» նորությունների գործակալությունը (ANHA) նախօրեին տեղեկացրել է, որ Սիրիայի Թել Թեմիր քաղաքի հայերը ոգեկոչել են Հայոց ցեղասպանության 110-րդ տարելիցը: Նրանք ընդգծել են, որ ցեղասպանության եւ ժխտողական քաղաքականության դեմ պայքարը շարունակվում է: Միջոցառումը կազմակերպել էր հայ նահատակ Նուբար Օզանյանի անվան գումարտակը՝ քաղաքի զոհված հերոսների եւ հերոսուհիների ընտանիքների խորհրդի դահլիճում:
Տասնյակ բնակիչների մասնակցությամբ տեղի ունեցած արարողությունը սկսվել է մեկ րոպե լռությամբ՝ ի հարգանս զոհվածների, ինչին հաջորդել են ելույթները: Դրանցում շեշտվել է, որ ժամանակակից թուրքական պետությունը Օսմանյան կայսրության պատմական ու քաղաքական շարունակությունն է, որը համակարգված ցեղասպանություն է իրականացրել հայերի, ասորի-քաղդեացիների, սիրիացիների, քրդերի եւ տարածաշրջանի բոլոր ժողովուրդների նկատմամբ՝ «մեկ գույնի ու մեկ մշակույթի» քաղաքականության շրջանակներում: Ընդգծվել է, որ Թել Թեմիրը, որը հետ է մղել ԴԱԻՇ-ի վարձկանների եւ Անկարայի կողմից աջակցվող զինյալների հարձակումները, հասարակության բոլոր տարրերի միասնության եւ զոհաբերության շնորհիվ համակեցության ու դիմադրության կենդանի օրինակ է:
Միջազգային հանրությանը կոչ է արվել ամբողջովին ճանաչել Հայոց ցեղասպանությունը եւ պատասխանատվության ենթարկել թուրքական իշխանություններին՝ տարածաշրջանի բնիկ ժողովուրդների դեմ կատարված ինչպես պատմական, այնպես էլ շարունակվող հանցագործությունների համար:
Միջոցառումը եզրափակվել է «Սանֆիզիոն» վավերագրական կինոնկարի ցուցադրությամբ՝ նվիրված Հայոց ցեղասպանության իրադարձություններին ու Օսմանյան կայսրության կողմից հայ ժողովրդի կրած տառապանքներին: Կարեւորվել է Թուրքիայի կողմից շարունակվող ժխտողական քաղաքականության եւ միջազգային արդարության բացակայության պայմաններում հայ ժողովրդի ու երկրի այլ համայնքների դիմադրողականությունն ու ինքնակազմակերպվածությունը՝ նման ողբերգության կրկնություն թույլ չտալու համար:
Գործակալության մեկ այլ հաղորդմամբ՝ նույն առիթով ապրիլի 22-ին երկրի Ջազիրա նահանգի Ղամիշլի քաղաքում Հայկական դեմոկրատական երիտասարդական շարժման անդամները նաեւ բողոքի ցույց են կազմակերպել ՄԱԿ-ի փախստականների հարցերով գերագույն հանձնակատարի գրասենյակի մոտ: Մասնակիցները Ցեղասպանության ճանաչման, արդարության պահանջներով եւ այլ պաստառներ, պատկերներ, «Հայկական միություն» կուսակցության դրոշներ են պարզել: Ընթերցվել է հայ դեմոկրատական երիտասարդական շարժման համապատասխան հայտարարությունը:
ԳԵՂԱՄ ՄԿՐՏՉՅԱՆ
