Վերջերս ՀՀ գիտությունների ազգային ակադեմիայում տեղի ունեցավ «Հայկական համադպրոցական գիտության փառատոն-2025»-ի հաղթող նախագծերի պարգեւատրման արարողությունը: «Հայկական համադպրոցական գիտության փառատոն-2025»-ի նպատակն է դպրոցահասակ երիտասարդների շրջանում գիտական հետազոտությունների նկատմամբ հետաքրքրության սերմանումը, խմբային աշխատանքի, նորարարական նախագծերի իրականացման եւ դրանց ներկայացման հմտությունների զարգացումը: Փառատոնի հաղթող ճանաչվեցին 62 նախագծերի հեղինակ շուրջ 130 աշակերտներ:
Նշվեց, որ նման միջոցառումները շատ կարեւոր են եւ նպատակ ունեն գիտության բաղադրիչը ներդնել դպրոցներում: Երեխաների մասնագիտական կողմնորոշումը պետք է դպրոցում տեղի ունենա: Անհրաժեշտ է դպրոցներում զարգացնել բնական գիտությունները: Այսօր մենք ապրում ենք գիտության, բարձր տեխնոլոգիաների դարաշրջանում: Գիտությունների ազգային ակադեմիայի ավելի քան երեք տասնյակ ինստիտուտները պատրաստ են աջակցելու նման նախաձեռնությունների զարգացմանը:
Նշվեց, որ «Հայկական համադպրոցական գիտության փառատոն»-ի շրջանակում ներկայացվող նախագծերի թիվը տարեցտարի ավելանում է: Եթե 2021թ-ին ընդամենը 38 նախագիծ կար, ապա 2025թ-ի համար արդեն 91 տարբեր նախագծեր են ներկայացվել 5 տարբեր անվանակարգերում: Հարկ է ավելացնել, որ Գիտության փառատոնի հաղթողներն են հետագայում հնարավորություն ստանում մասնակցել նաեւ միջազգային գիտական փառատոնների:
Ստեփան ՊԱՊԻԿՅԱՆ
