Հայոց ցեղասպանության 108-րդ տարելիցի առթիվ Մեքսիկայի Միչոական նահանգի Պանինդիկուարո քաղաքում ապրիլի 22-ին տեղադրվել են հայկական երեք խաչքարեր, որոնք Ջեկ եւ Դիամանդուլա Սահակյան ընտանիքի հովանավորությամբ պատրաստվել են նույն նահանգի Տլալպուխաուա քաղաքում վարպետ Ռիգոբերտոյի կողմից, դառնալով այդ երկրի հանրային վայրերից մեկում տեղադրված առաջին հայկական հուշակոթողները: Այս մասին է տեղեկացնում Կառլոս Անթառամյանը, հավելելով. «Միչոականում ապրող հայերի թիվը չափազանց փոքր է: Մորելիայում ապրող Սահակյան ընտանիքից բացի, անտեղ ապրում է նաեւ Անթառամյան ընտանիքի մի մասը: Այնուհետեւ Ուրուապանում Ֆրանսիայից տեղափոխված Ալեն Ավագյանի ընտանիքն է ապրում, իսկ Էրոնգարիկուարոյում (Պացկուարո լճի մոտակայքում) Եթովպիայում ծնված նկարիչ Վաչե Գյովճելյանի ընտանիքը: Միչոական նահանգում ապրող հայերի թիվը չի գերազանցում 15-ը: Հայերի մեծամասնությունը ապրում է Մեքսիկա քաղաքում, Տիխուանայում, Ակապուլկոյում, Քերետարոյում եւ երկրի այլ մասերում: Կարելի է ասել, որ ընդհանուր առմամբ ամբողջ երկրում մեքսիկահայերի թիվը տատանվում է 2.500-ից 3000-ի սահմաններում, ընդ որում ոչ մի հայ չի ապրում Պանինդիկուարոյում: Բնականաբար հարց է ծագում, թե ինչո՞ւ ուրեմն 3 խաչքար է այնտեղ տեղադրվել»:
Ջեկ Սահակյանի ասելով գլխավոր պատճառը իր սերտ հարաբերություններն են քաղաքապետ Մանուել Լոպեզ Մենենդեսի հետ, որի խնդրանքով գումարներ է ներդրել քաղաքի զարգացման ծրագրերին: Քաղաքն ունի մոտ 18 հազար բնակիչ, կլիման դուրեկան է եւ մարդիկ` շատ սիրալիր: «Այդ պատճառով էլ, շարունակել է Ջեկը, շատ հաճախ եմ լինում այդ վայրում: Երրորդ պատճառը 2016-ին վախճանված հորս` Սարգիս Սահակյանի հետ է առնչվում: Ամեն անգամ, երբ գործի բերումով այցելում էր այդ քաղաքը, սիրում էր նստել կենտրոնական հրապարակներից մեկում: Այցելություններից մեկի ժամանակ նկատում է, որ այնտեղ գտնվող եկեղեցու զանգակներից մեկը ջարդված է: Հայրս նյութական օժանդակություն է առաջարկում այն վերանորոգելու համար եւ թեեւ ինքը չի հասցնում, բայց ես հանձն եմ առել իրականացնել այդ ծրագիրը:
«Խաչքարերը, հայերի նման ցրված են աշխարհի ամենահեռավոր անկյուններում եւ հայկական մշակույթն ու հավիտենականության խորհուրդն են իրենց մեջ հավերժացնում: Որտեղ որ ապաստան են գտել հայերը` եկեղեցի, դպրոց եւ ակումբ են կառուցել ու խաչքար տեղադրել` սկսած Սվազիլենդից, Սինգապուրից, Մադրասից (Հնդկաստան), Դակայից (Բանգլադեշ) եւ Ղերլայից (Ռումինիա) եւ վերջացրած բազմաթիվ այլ վայրերում: 30 խաչքար կա Ֆրանսիայում: Խաչքարեր կան Մադրիդում, Սիդնեյում եւ Հարավային Ամերիկայի զանազան քաղաքներում», գրում է Անթառամյանը:
Պանինդիկուարոյում խաչքարերի տեղադրման արարողությանը ներկա են գտնվել Մեքսիկայում ՀՀ դեսպան Արմելլա Շաքարյանը, Սասուն վրդ. Զմրուխտյանը, Հովնան արք. Տերտերյանը, Միչոականում ՀՀ հյուպատոս Ժակ Սահակյանը, Լիբանանյան մշակույթի համաշխարհային միության նախագահ Նաբիհ Շարտունին, Պանինդիկուարոյի քաղաքապետ Մանուել Լոպեզ Մենենդեսը եւ տարածաշրջանի հասարակական անվտանգության քարտուղար գեներալ Ալֆրեդո Օրտեգա Ռեյեսը:
Պատրաստեց` ՀԱԿՈԲ ԾՈվՒԼԻԿՅԱՆԸ
(The Armenian Mirror-Spectator)
