Լուսանկարում Կենտրոնական ընտրական հանձնաժողովի նոր կազմն է: Համաձայնեք՝ զուտ միայն էսթետիկ առումով ԿԸՀ անդամները բավական գեղեցիկ են նայվում. կանգնել են ըստ աստիճանակարգի, պահպանել համաչափությունն ու անգամ գենդերային հավասարությունը: Ինչ վերաբերում է լուսանկարի հերոսների՝ նորընտիր ԿԸՀ անդամների գործի բովանդակությանը, ապա դա նրանց հետագա աշխատանքը ցույց կտա: ԿԸՀ հնաբնակների՝ տարիների փորձ ունեցող երեք անդամների աշխատանքը տեսել ենք, գնահատում ենք, իսկ ինչ վերաբերում է նորեկներին, ապա հույս հայտնենք, որ կհաջողեն: Բայց դատելով զուտ միայն այն հագմանաքից, որ ԿԸՀ նախագահ Վահագն Հովակիմյանն Ազգային ժողովում իր իսկ ընտրությունն է անհարթ կերպով կազմակերպել, ապա արդարացի հարց է առաջանում՝ իսկ մյուս ընտրությունները, ինչի թիվ մեկ պատասխանատուն այլեւս ինքն է, ինչպե՞ս է կազմակերպելու: Նշենք, որ արդեն նախկին պատգամավոր Վահագն Հովակիմյանը՝ իշխող «Քաղաքացիական պայմնագիր» խմբակցությունից, ԱԺ-ում կազմակերպված քվեարկության ժամանակ ընտրել էր ԿԸՀ անդամի թեկնածու Վահագն Հովակիմյանին, այսնինքն՝ ինքն իրեն: Քաղաքացիական հասարակության ներկայացուցիչներն այս հարցում շահերի բախում են տեսնում ու արձանագրում՝ պետական մի կառույցից մեկ այլ գերատեսչություն գնացող անձն ինքն իրեն չի կարող ընտրել: Բայց եթե այս հարցում իրավաբանների, քաղհասարակության ներկայացուցիչների, ինչպես նաեւ՝ ոլորտի փորձագետների տեսակետը միանման չէ (ոմանք ասում են, թե ինքն իրեն ընտրելու մեջ օրինազանցություն չկա), ապա ԿԸՀ նախագահի պաշտոնը քաղաքական մարդու վստահելու անկարելիության մասով բոլորն են համակարծիք:
Թե՛ քաղհասարակության ներկայացուցիչները, թե՛ իրավաբաններն ու փորձագետները միաբերան պնդում են՝ վարչապետ Նիկոլ Փաշինյանի մտերիմը՝ Հովակիմյանը չէ, որ պետք է ԿԸՀ նախագահ ընտրվեր: Իշխող «Քաղաքացիական կուսակցության» կարկառուն դեմքը, ասում են իրավաբանները, կուսակցական անդամակցությունը դադարեցնելով, բնավ չի նշանակում, թե այլեւս իր հարազատ կուսակցությանը չի հարելու: Ավելին՝ երաշխիքներ չկան, որ կուսակցության վարչության անդամների կամ առաջնորդների քաղաքական որոշումները նաեւ նրա վրա չեն անդրադառնալու: Կուսակցական կրծքանշանը մի կողմ դնելը բնավ չի նշանակում, թե արդեն ապաքաղաքական ու իշխանության որոշումներից չկաշկանդվող անձն ես:
Հովակիմյանի պաշտոնավարումը հակասահմանադրական ճանաչելու մասով այժմ ԱԺ «Պատիվ ունեմ» խմբակցությունն է պատրաստվում Սահմանադրական դատարան դիմել: Տեսնեք՝ ի՞նչ ընթացք կունենա գործը:
ՍԵՎԱԿ ՎԱՐԴՈՒՄՅԱՆ
