Լսումներ՝ առանց պատգամավորների

31

2018-ի քաղաքական վերադասվորումներից հետո Նիկոլ Փաշինյանի քաղաքական թիմը «Ընտրական օրենսգրքի» փոփոխությունների մասին խոսում է պատեհ ու անպատեհ բոլոր առիթներով: Եթե ընդդիմադիր Նիկոլ Փաշինյանը, քարը քարին չթողնելով, քննադատում էր ԸՕ-ի, օրինակ, այսպես ասած, «ռեյթինգային», համակարգը, ապա արդեն իշխանության եկած Փաշինյանի թիմը 2018-ի խորհրդարանական արտահերթ ընտրություններն առանց այդ համակարգից հրաժարվելու անկացրեց: Ոչ միայն «ռեյթինգային» ընտրակարգի, այլ «Ընտրական օրենսգրքի» տարբեր դրույթների մասին այժմյան իշխանության տարբեր ներկայացուցիչներ տարբեր ժամանակներում հաճախ իրար հակասող հայտարարություններ են արել, ու այդպես էլ հասկանալի չէ՝ Փաշինյանն ու թիմակիցներն իրականում ԸՕ-ի վերջնական ինչիպիսի՞ տարբերակ են ուզում ունենալ:

Օրենսգրքում հերթական փոփոխութուն անելու նպատակով երեկ՝ հունիսի 23-ին, Ազգային ժողովի պետական-իրավական հարցերի մշտական հանձնաժողովը լսումներ էր հրավիրել, ինչին սակայն հաշված թվով պատգամավորներ էին մասնակցում: Քննարկմանը քաղաքացիական հասարակության ներկայացուցիչներից զատ ներկա էին Ազգային ժողովի պետական-իրավական հարցերի մշտական հանձնաժողովի փոխնախագահ Վահագն Հովակիմյանը, պատգամավոր Արթուր Դավթյանն ու եւս երկու-երեք պատգամավոր: Օրենսգրքում փոփոխություններ կատարելու նախագծի բոլոր հեղինակներն անգամ ներկա չէին խորհրդարանական լսումներին: Օրենսդրական փոփոխությունները շրջանառել են իշխող «Քաղաքացիական պայմանագիր» խմբակցության պատգամավոր Վահագն Հովակիմյանը, Արփինե Դավոյանը, Հակոբ Ասլանյանը, Արմեն Խաչատրյանը: Բացի Վահագն Հովակիմյանից, որ նախագահում էր լսումներն ու Հակոբ Ասլանյանից, որ կիսատ-պռատ էր մասնակցում քննարկմանը, մյուս համահեղինակները դահլիճում չէին:

Սա ոչ այլ ինչ է, քան վերաբերմունք խորհրդարանի աշխատանքին: Իշխանության պատգամավորներին փաստորեն, չի հետաքրքրում, թե վաղը, մյուս օրը, երբ օրինագիծը լիագումար նիստերի օրակարգում ներառվի, ինչի՞ն են կողմ կամ դեմ քվեարկելու:

ՍԵՎԱԿ ՎԱՐԴՈՒՄՅԱՆ