Մամուլից տեղեկանում ենք, որ Եվրասիայի երկրներում հավատարմագրված Իսրայելի դեսպանների հավաքը կայանալու է հունվարի 16-18-ը՝ Բաքվում: Ադրբեջանի կողմից ընդունված այս որոշումն Իրանում ընկալվել է որպես հերթական հակաիրանական քայլ:
Իսրայելի արտաքին քաղաքականության հայեցակարգում կարեւոր տեղ է հատկացված Կովկասի երկրներին, որտեղ առավելությունը տրված է Ադրբեջանին: Հասկանալի է, որ Ադրբեջանի Հանրապետության հետ Իսրայելի համագործակցության հիմքում դրված է եղել Իրանի սահմաններին մերձենալու խնդիրը, ինչն, անշուշտ, ըստ իսրայելցիների, պայմանավորված է Իսրայելի անվտանգության ապահովման հրամայականով:
Իրանի արտաքին քաղաքականության հայեցակարգում նույնպես նշանակալի տեղ է հատկացված իսլամական Իրանին ուղղված Իսրայելից ակնկալվող վտանգի չեզոքացման խնդրին, որից ելնելով էլ Իրանը ջանք եւ միջոց չի խնայել դիրքավորվելու Իսրայելամերձ երկրներում:
Այսօր հայ-ադրբեջանական հակամարտության հետեւանքով օրավուր խորացող Իրան-Ադրբեջան լարված հարաբերությունների պայմաններում Իսրայելին հաջողվել է ամրապնդել իր կապերն Ադրբեջանի հետ:
Դեկտեմբերի 18-ին Ադրբեջանը պաշտոնապես հայտարարեց, որ պատրաստվում է Թել Ավիվում դեսպանություն հիմնել: Նորանշանակ դեսպան Մուխթար Մամեդովի ներկայացման առիթով Ադրբեջանի նախագահ Ալիեւն ասել է, որ Իսրայելի հետ հարաբերությունները «առանձնահատուկ նշանակություն» ունեն Բաքվի համար:
Բաքվում հավատարմագրված Իսրայելի դեսպան Ջորջ Դիքը Թել Ավիվում ադրբեջանական դեսպանություն հիմնադրելու կապակցությամբ գրառում է կատարեել իր թվիթերյան էջում, նշելով, որ այդ առիթով պետք է բաժակ բարձրացնել: Սակայն դեսպան Դիքի՝ Իրանի մասին մեկ այլ թվիթերյան գրառում զայրացրել է Բաքվում հավատարմագրված ԻԻՀ դեսպան Մուսավիին, որ իր հերթին պատսխանել է իսրայելցի դիվանագետի գրառմանը:
Իսրայելի դեսպանի թվիթերյան գրառման մեջ կարդում ենք. «Իսլամական հեղափոխությունից հետո, հատկապես այս օրերին, իրանաբնակ հրեաների աղետալի վիճակը նկատի ունենալով, կարելի է պատմություններ հյուսել նրանց ողբերգական կյանքի եւ անցյալի նկատմամբ ունեցած կարոտախտի մասին»:
Իսկ Բաքվում Իրանի դեսպանն էլ պատասխանել է. «Հակառակ սիոնիստական ժամանակավոր եւ շինծու վարչախմբի 70-ամյա անցյալի, որի գոյության ընթացքում բազում ազգեր են այդ քաղցկեղային գոյացությունից տառապել, 7000-ամյա պատմություն ունեցող Իրանը մշտապես եղել է աշխարհի կայունության խարիսխը»: Վերջում Իրանի դեսպանը ավելացրել է՝ «այս գոյացությունը պետք է վիրահատական միջոցով հեռացվի»:
ԳՐԻԳՈՐ ԱՌԱՔԵԼՅԱՆ
