Gala Art Gallery-ին շարունակում է իր ամենամսյա ցուցադրությունների շարքը եւ այս անգամ մեզ ներկայացնում է «Ապրող գույներ» ցուցադրությունը: Հայր ու դուստր Աշոտ եւ Մարգարետ Ասատրյանների աշխատանքները պատկերում են ակնթարթն ու հավերժությունը, յուրաքանչյուրն իրեն հատուկ ոճով:
Աշոտ Ասատրյանի համար առաջնային է պահը: Աշխատանքներում նկատվում են իմպրեսիոնիզմին հատուկ երանգներ: Անդեմ պատկերներն (անդեմ՝ բառի բուն իմաստով, քանզի արվեստագետի կերպարները դիմագծեր չունեն) ասես անցյալի վաղեմի հուշեր լինեն: Պարուհիները տրվել են իրենց արվեստին, տղամարդն ու կինը իրար մեջք մեջքի են կանգնել, որտեղ տղամարդը լուսավորվել է կնոջ լույսով, իսկ կինը մնացել է տղամարդու ստվերում, իսկ բալետ պարող աղջնակը նստել է հանգստի: Որոշ գործերում հստակորեն արված ֆիգուրները փոխարինվում են գծային՝ աբստրակտ հորինվածքներով: Նկարիչն աշխատում է հիմնականում պասիվ գույներով, ինչը նրա աշխատանքներին նոստալգիկ տարր է հաղորդում:
Մարգարետ Ասատրյանը նախընտրում է աբստրակտը: Ակադեմիական նկարչությունն աղջկան շատ չի գրավել, ու նկարչուհին իրեն գտել է հենց աբստրակտ արվեստում, որտեղ կոնկրետ ֆորման ձուլվում է հեռանկարի ու տարածության գույներին ու կորցնում իր ֆիզիկական ընկալումը: Նկարչուհու աշխատանքներում գույները միջնորդում են, քաոսում ծնվում է ներդաշնակություն: Մարգարետի գործերում գերակայում է տպավորությունը, որը դիտորդին միանգամայն տարբեր՝ զուգորդող տրամադրություն է փոխանցում, լինի որեւէ հուշի, կամ թե ներքին ապրումների միջոցով:
Ցուցահանդեսը գործում է ապրիլի 21-ից մինչեւ մայիսի 2-ը Gala Art Gallery-ում:
ՀՐԱՉՅԱ ԳԱԼՍՏՅԱՆ
