Ադրբեջանն ինքն է ուզում գազ մատակարարել Արցախին

91

Մարտի 21-ից ադրբեջանական կողմի ուղիղ միջամտության հետեւանքով Արցախում կրկին դադարեցվել է գազամատակարարումը։ Արցախի մեր հայրենակիցները կապույտ վառելիքից դեռեւս մարտի 8-ից էին զրկված, երբ Շուշի-Զառիֆլու բնակավայրերի տարածքում տեղի ունեցած վթարի հետեւանքով գազամատակարարումը խափանվել էր։ Ռուս խաղաղապահների աջակցությամբ իրականացվող բանակցությունների շնորհիվ գազատար խողովակի վերնորոգվել էր, բայց օրեր անց՝ մարտի 21-ին, գազմատակարարումը կրկին դադարեցվել էր։

Վարչապետ Նիկոլ Փաշինյանը կառավարության  երեկվա՝ նոյեմբերի 24-ի, նիստի ժամանակ հայտարարեց, թե ըստ գործադրին հասած լուրերի՝ ադրբեջանական կողմը գազի խողովակի վրա փական է դրեն ու ըստ անհրաժեշտության բացում-փակում է փականը։

Հումանիտար ճգնաժամ ստեղծող իրավիճակը պաշտոնական Բաքվից բոլորովին այլ դիտանկյունից են մեկնաբանում։ Ադրբեջանցի քաղաքական մեկնաբան Ազեր Քերիմովը JAMnews լրատվական կայքին տված հարցազրույցում նշել է, թե «Հայաստանից դեպի Ստեփանակերտ գնացող գազմուղն ինքնին անօրինական է»։

«Եթե օրենքի լեզվով խոսենք, ապա Ադրբեջանի սահմաններում այլ երկրից գազ կարող է լինել միայն երկուստեք համաձայնության դեպքում, բայց Հայաստանն ու Ադրբեջանն այս պահին որեւէ շփում ու հարաբերություն չունեն։ Իդեալականն այն կլիներ, որ Հայաստանը Ստեփանակերտին գազ մատակարարեր՝ այն Ադրբեջանցից ձեռք բերելով։ Եթե Ադրբեջանը Հարավային Եվրոպային կարողանում է գազով ապահովել, ապա ինչո՞ւ չի կարող նաեւ Ղարաբաղին գազ տրամադրել։ Մինչ այդ սակայն Հայաստանն ու Ադրբեջանը պետք է բանակցությունների սեղանի շուրջ նստեն, իսկ բոլոր այդ հարցերը կարող են խաղաղության պայմանագրի շրջանակներում քննարկվել»,- ասել է քաղաքագետը։

Ադրբեջանը, փաստորեն, չի հանդուրժում, որ Արցախում իրենից առաջ ընկնելով՝ մեկ այլ պետություն կարող է գազ մատակարարել ու այնպես է անում, որ Հայաստանը գազ ձեռք բերի միայն իրենից։ Բացառված չէ, որ ադրբեջանցիները վաղը, մյուս օրն ուրիշ այլ խոչընդոտներ ստեղծեն արցախահայության համար՝ փորձելով սեփական բնօրրանից անջատել նրանց։ Իսկ դա ոչ այլ ինչ է, քան ուղղակի էթնիկ զտում։ 

ՍԵՎԱԿ ՎԱՐԴՈՒՄՅԱՆ