Արմինֆո. «Արդյունաբերական ընկերություն» ԲԸ-ն, որը «Զանգեզուրի պղնձամոլիբդենային կոմբինատ» ՓԲԸ-ի բաժնետոմսերի 25% -ը նվիրաբերել է ՀՀ կառավարությանը, «ԳեոՊրոՄայնինգ Արմենիա» ընկերության 100% դուստր ձեռնարկությունն է:
Սեպտեմբերի 30 -ին ընկերությունը ձեռք բերեց «Զանգեզուրի պղնձամոլիբդենային»-ի 60%-ը: Այս մասին ասվում է ՀՀ կառավարության եւ «Արդյունաբերական ընկերություն» բաժնետիրական ընկերության (ԲԸ) համատեղ հայտարարության մեջ:
Ավելի վաղ ԱրմԻնֆո գործակալությունը տեղեկացրել էր, որ ՀՀ կառավարությունը որպես նվեր ընդունել է «Զանգեզուրի պղնձամոլիբդենային կոմբինատ» ՓԲԸ-ի՝ Հայաստանի խոշորագույն հանքարդյունաբերական ընկերության 25% բաժնեմասը` ռուսական «Արդյունաբերական ընկերություն» ԲԸ կողմից: Որոշումը կայացվել էր «գրավոր քվեարկությամբ» եւ հրապարակվել սեպտեմբերի 30-ին, ուշ երեկոյան կառավարության պաշտոնական կայքում: Փաստաթղթի համաձայն, բաժնետոմսերի կառավարման լիազորությունները վերապահված են ՀՀ վարչապետի աշխատակազմին:
«Արդյունաբերական ընկերություն» ԲԸ-ն եւ Հայաստանի կառավարությունը ուրախ են հայտարարել, որ ընկերությունը բաժնետոմսերի 25%-ը փոխանցել է ՀՀ կառավարությանը: Ընկերությանը պատկանում է Զանգեզուրի պղնձամոլիբդենային կոմբինատի բաժնետոմսերի 60%-ը: Հայաստանի կառավարությանը փոխանցված բաժնետոմսերի 25%-ը կազմում է «Զանգեզուրի պղնձամոլիբդենայինի» ընդհանուր կապիտալի 15%-ը, որը, հետեւաբար, անցել է Հայաստանի Հանրապետության տիրապետությանը», – ասված է համատեղ հայտարարության մեջ:
«ԳեոՊրոՄայնինգ»-ի տնօրենների խորհրդի անդամ Ռոման Տրոցենկոն նշել է, որ ընկերությունը երկար տարիներ է գործում Հայաստանում եւ գրեթե երկու տասնամյակ վստահելի գործընկեր է Հայաստանի Հանրապետության եւ հայերի համար: «Մենք ուրախությամբ օգտվեցինք հնարավորությունից՝ մեր բիզնեսն ավելի ընդլայնելու Հայաստանում եւ ձեռք բերելու «Զանգեզուրի պղնձամոլիբդենայինի» վերահսկիչ փաթեթը՝ միաժամանակ առաջարկելով Հայաստանին 15% բաժնեմաս: Մենք մտադիր ենք ընդլայնել համագործակցությունը ՀՀ կառավարության հետ, եւ սա մեր ավելի լայն ներդրումային տեսլականի առաջին քայլն է։ Դա շահավետ կլինի Հայաստանի Հանրապետության, ժողովրդի եւ մեր բաժնետերերի համար, ինչպես նաեւ նոր հնարավորություններ կստեղծի Հայաստանի տնտեսության համար: Մենք մտադիր ենք առաջիկա տարիներին սկսել Հայաստանում նոր պղնձաձուլարանի շինարարություն», – ասել է Տրոցենկոն:
ՀՀ փոխվարչապետ Սուրեն Պապիկյանն, իր հերթինմեկնաբանելով գործարքը, շնորհակալություն հայտնեց «Արդյունաբերական ընկերությանը» այն բանի համար, որ «հնարավորություն տվեց Հայաստանի ժողովրդին ունենալ մասնաբաժին երկրի խոշորագույն արդյունաբերական ակտիվներից մեկում»։ «Այս պրակտիկան, որը տարածված է ամբողջ աշխարհում հանքարդյունաբերության ոլորտում, կարող է օրինակ ծառայել հայ ժողովրդի համար, այն իմաստով, թե ինչպես է գործնականում գործում շահագրգիռ կողմերի կապիտալիզմի եւ ընդհանուր արժեքների հայեցակարգը: Մենք վստահ ենք, որ այս համատեղ նախագիծը սկիզբ կդնի Հայաստանում ավելի կառավարվող, ավելի ներառական եւ կայուն հանքարդյունաբերության ոլորտին, ինչից կշահի ինչպես երկիրը, այնպես էլ ներդրողը», – հայտարարեց ՀՀ փոխվարչապետը։
Հիշեցնենք, որ սեպտեմբերի 20-ին Ռոման Տրոցենկոն Երեւանում հայտարարել էր, որ AEON Corporation-ը հետաքրքրություն է ցուցաբերում Հայաստանում պղնձաձուլարանի (ձուլարանի) շինարարության նկատմամբ:
ԱրմԻնֆո գործակալության թղթակցին տված հարցազրույցում Տրոցենկոն ընդգծել էր, որ ընկերությունը դեռ չի սկսել ուսումնասիրել այս ծրագրի իրականացման (fieasibility study/տեխնիկատնտեսական հիմնավորումներ) հնարավորությունները, քանի որ դրա համար անհրաժեշտ է քաղաքական որոշում, թե որն է լինելու նախագիծը. որոշելու այս նախագծի վայրը, բնույթը, քանի որ այն կապված է այնպիսի բաների հետ, ինչպիսիք են էներգիան, որի արտադրությունը դեռ բավարար չէ, ջրի շրջանառության ցիկլը՝ կապված այն հարցի հետ, թե որտեղից ջուր ստանալ եւ ինչպես օգտագործել այն, եւ այլ հարցեր: Սա, ինչպես նկատեց գործարարը, բավականին բարդ նախագիծ է, ուստի դրա այն իրականացվելու է փուլային տարբերակով:
Տրոցենկոն նշել էր, որ որպես կանոն, նախագծի մեկնարկից մինչեւ առաջին շինարարություն ժամանակահատվածը կազմում է 2-2,5 տարի, ուստի եւ հանդիպման օրը կարելի գրանցել որպես ծրագրի քննարկման մեկնարկ: «Ես համաձայն եմ, որ սա լավ նախագիծ է, եւ այժմ անհրաժեշտ է այն իրականացնել , դրա համար փնտրելով ռեսուրսներ, տարածք, էներգետիկա», – շեշտել է Տրոցենկոն:
Նշենք, որ Geopromining (ԳեոՊրոՄայնինգ) ընկերությունների խումբը Հայաստան է մուտք գործել 2007 թվականից՝ ձեռք բերելով GPM Gold- ը, որը շահագործում է Սոտքի ոսկու հանքավայրը եւ Արարատի ոսկու արդյունահանման ֆաբրիկան: Այնուհետեւ ընկերությունը ձեռք բերեց Ագարակի պղնձամոլիբդենային կոմբինատը (ՊՄԿ): Ընկերությունը ներդրել է մոտ 400 մլն դոլար Հայաստանի տնտեսության մեջ եւ դարձել է Հայաստանում մասնավոր արդյունաբերական խոշորագույն ներդրողը: Ներդրումներն ուղղված էին երկու ձեռնարկությունների տեխնիկական վերազինմանը եւ տեխնոլոգիական արդիականացմանը: Այսպիսով, «GPM Gold» ընկերությունը դարձավ առաջինն աշխարհում, որտեղ հաջողությամբ ներդրվեց դժվար կորզելի հանքաքարերի մշակման «Ալբիոն» տեխնոլոգիան: Ագարակի ՊՄԿ-ն հաջողությամբ ավարտեց արտադրության արդիականացման երկու փուլը: «ԳեոՊրոՄայնինգ»-ը Հայաստանի հինգ խոշոր հարկատուներից մեկն է: Ընկերությունը նաեւ ավելի քան 10 միլիոն դոլար է նվիրաբերել սոցիալական տարբեր նախագծերի՝ Կորպորատիվ սոցիալական պատասխանատվության ծրագրի շրջանակներում:
Geopromining-ի հիմնադիր Սիման Պովարենկինը ընկերությունը վաճառեց գործարար Ռոման Տրոցենկոյին, ով ընկերության կապիտալ է մուտք գործել 2020 թվականին:
Նաիրա Բադալյան
Թարգմ․՝ Զ․Մ․
02.10.21թ
