Թուրքիայի նախագահի խոսնակ Իբրահիմ Քալինը հայտարարել է, որ Անկարան նորից է դիմել ԱՄՆ-ին՝ բանակցություններ վարելու ռուսական Ս-400 հակաօդային պաշտպանության համակարգերի խնդրահարույց հարցերի և Թուրքիայի՝ F-35 կործանիչների ծրագրից դուրս մնալու վերաբերյալ:
«Մենք կրկնում ենք ԱՄՆ-ին մեր առաջարկը Ս-400-ը, F-35-ը և CAATSA պատժամիջոցները քննարկելու համար: Մենք կարող ենք այդ հարցերը լուծել բանակցությունների միջոցով, եթե ռազմավարական գործընկերներ և դաշնակիցներ ենք: Մենք սպասում ենք, որ սխալները կշտկվեն», ասել է նա Hurriyet թերթին։
Քալինը նշել է, որ Թուրքիայի նախագահի աշխատակազմը շարունակում է նախապատրաստվել ԱՄՆ առաջնորդ Ջո Բայդենի հետ բանակցություններին, որոնք նախատեսված են հունիսին կայանալիք ՆԱՏՕ-ի գագաթաժողովում: «Մենք Բայդենի վարչակազմից կոնկրետ քայլերի ենք սպասում», ասել է նա:
«Եթե ընդունելի պայմաններ լինեն, մենք Ս-400-ի հետ միասին կգնենք Patriot համալիրներ: Բայց մենք պետք է հաշվի առնենք ազգային շահերը: Եվ դա ամենևին չի նշանակում, որ [համագործակցության] այլընտրանքներ չեն մնում», շեշտել է նա:
