Քպ-ն ԱԺ նախագահի պաշտոնին տեսնում է ոչ թե Ալեն Սիմոնյանին, այլ Ռուբեն Ռուբինյանին։
Այս առնչությամբ լրագրողներն ԱԺ-ում հարց են ուղղել Ալեն Սիմոնյանին։ Նա պատասխանել է, որ ուզում է մի քիչ հանգստանալ։ Իր համար աշխատանքային ծանր տարի է եղել։
Մի մոռացեք, որ սա հետպատերազմյան Ազգային ժողով էր, շատ մարտահրավերների և ծանր իրավիճակների միջով անցած Ազգային ժողով էր և իրոք շատ դժվար էր այն աշխտանքը, որ ես իմ գործընկերների հետ մեկտեղ իրականացրել եմ։ Իսկականից ուզում եմ մի քիչ հանգստանալ։ Նաև անձնական կյանք ունեմ, նաև անձնական կյանքս եմ ուզում ինչ–որ ձևով վերջնական կարգավորեմ, և ուզում եմ ինչ–որ ժամանակ դուք էլ ինձ կարոտեք և մարդկանց շատ չհոգնացնեմ»,-ասել է Սիմոնյանը։
Այնուհետև անդրադարձել է ԱԺ նախագահի պաշտոնում իր գործունեությունը և Քպ-ի որոշմանը։
«Ես ցանկացել եմ շարունակել իմ աշխատանքը ԱԺ նախագահի պաշտոնում, քանի որ լինելով պատմության մեջ ամենաերկար պաշտոնավարած ԱԺ նախագահը, ով ամբողջությամբ իր ժամկետն աշխատել է, կարծում եմ, որ իմ 5 տարվա աշխատանքը պետք էր շարունակել, բայց նաև գոյություն ունի կուսակցություն և վարչություն, և ես միշտ նշել եմ՝ ոնց կորոշի վարչությունը։
Ես ենթարկվում եմ իմ վարչության որոշմանը և չեմ շարունակի աշխատանքը ԱԺ նախագահի պաշտոնում։ Նեղվածություն, որպես այդպիսին չունեմ, կարծում եմ, որ աշխատանքային պրոցեսը ենթադրում է ինչ-որ փոփոխություններ պետք է լինեն։ Ենթադրում եմ՝ ինչ-որ փուլում, ինչ-որ տեղում օգտակար կլինեմ մեր երկրին, մեր կուսակցությանը։ Ես վարչապետի հետ քննարկել եմ, նաև վարչության հետ եմ խոսել, չեմ վերցնի մանդատը և չեմ գա Ազգային ժողով որպես պատգամավոր»,– հայտարարել է նա։
Սակայն հիշենք, որ Ալեն Սիմոնյանը նույնպես հավակնում էր ԱԺ նախագահի պաշտոնին։ Նրա ցանկությունն ու Քպ-ի որոշումը չհամընկան։
