Մենք պետք է ունենանք մարդիկ, որոնք մտածում են ոչ թե պաշտոնների մասին, այլ ժողովրդի մասին։ Ես եղել եմ բարձրաստիճան պաշտոնյա, բայց իմ մտքով չի անցել, որ անձնական հարստություն կուտակեմ, իմ ազգուտակին տեղավորեմ, այսօր մարտունեցիների հետ հանդիպման ժամանակ հայտարարեց «Միասնության թևեր» կուսակցության առաջնորդ Արման Թաթոյանը։
Անդրադառնալով նախընտրական ծրագրին՝ նա շեշտեց՝ պետք է զարգացնել բժշկական տուրիզմը։
«Իսրայելը ո՞նց է դարձել։ Բոլորն ասում են՝ գնանք Իսրայել, աչքի վիրահատություն անենք։ Մենք կարող ենք ավելի լավը լինել։ Մենք պետք է տրամաբանություն փոխենք. ոչ թե մարդը պետք է աշխատի պետության համար, այլ պետությույնը՝ մարդու»,- ասաց նա։
Թաթոյանը նաև շեշտեց՝ ինքն արդեն իր շփումներից տեսնում է, որ «Միասնության թևեր»-ը պառլամենտ անցնում է։
«Մեր վարկանիշը գնալով բարձրանում է։ Ու հիմա սկսել են արհեստական բանականությունով կեղծիք տարածել, թե մենք միանալու ենք ՔՊ-ին։ Դա բացահայտ կեղծիք է, մենք մեր ձայները ոչ ոքի չենք վաճառելու։ Մենք երբեք Նիկոլ Փաշինյանին չենք ընտրելու վարչապետ, Ռոբերտ Քոչարյանին չենք ընտրելու վարչապետ, ՔՊ-ն չի կարող լինել Հայաստանում իշխանություն։
Ես երբեք չեմ երազել քաղաքական գործիչ դառնալ, բայց երբ ՄԻՊ էի, հասկացա, որ այդ դիրքով չեմ կարողանում շատ հարցեր լուծել։ Ես հասկացա, որ մեր թիմը, ես պատասխանատու պետք է լինենեք։ Ես երբեք մեղքը չեմ գցելու ժողովրդի վրա»,- ասաց Արման Թաթոյանը։
Փողոցում հանդիպելով երիտասարդների՝ Թաթոյանը հիշեցրեց, որ «Միասնության թևեր»-ը երիտասարդների համար շատ կարևոր ծրագրեր ունի. նախ, բարձրագույն կրթությունը պետք է լինի անվճար, իսկ վճարովի սովորողների համար պետք է լինեն ուսանողական վարկեր՝ ցածր տոկոսներով։
Մի արցախցի տղամարդու հետ զրուցելիս էլ Արման Թաթոյանն ասաց՝ Արցախն իր համար շատ մեծ արժեք է։
Նա շեշտեց՝ այս ընտրությունները պատմական կարևորություն ունեն։
«Լկտի պահվածքով պաշտոնյաներ չպետք է գոյություն ունենան մեր պետության մեջ։ Իմ վարչապետության ժամանակ, Աստված չանի, մեր մի քաղաքացու մազը ծռվի, կամ պաշտոնյան փորձի քաղաքացու հետ կոպիտ խոսել. գործ կունենա ինձ հետ։
Լկտի պահվածքով պաշտոնյաներն իրենց պարգևավճարների մասին են մտածում, բիզնես են դրել, խոսում են նախկինների մասին։ Տո ձեզնից էլ լավ նախկի՞ն. ճպճպում եք նախկինների մեջ։ Մենք պետք է ազատվենք հայհոյանք տվող, կեղտոտ բերան ունեցող պաշտոնյաներից»,- ասաց Թաթոյանը։
