Բարով եք եկել Հայաստան՝ մի երկիր, որտեղ կա 50-ից ավելի քաղբանտարկյալ, որտեղ իշխանություն կոչեցյալները ասպատակում են, հարձակվում են, պայքարում են Հայ ռաքելական սուրբ եկեղեցու դեմ։ Նախագահական նստավայրի դիմաց այսօրվա բողոքի ակցիայի ժամանակ այս մասին ասաց ԱԺ «Պատիվ ունեմ» խմբակցության ղեկավար Հայկ Մամիջանյանը՝ խոսքն ուղղելով Հայաստան ժամանած ԵՄ բարձրաստիճան պաշտոնյաներին։
«Դուք եկել եք մի երկիր, որի, ըստ պաշտոնական տվյալների, ավելի քան 200 ք/կմ օկուպացված է Ադրբեջանի կողմից, որի զավակաները Բաքվի բանտերում տանջվում են։
Դուք եկել եք մի երկիր, որի իշխանություններ կոչեցյալ մինչ օրս չգիտեն, թե քանի անհայտ կորած կա մեր երկրից։
Մենք բացարձակ հույս չունենք, որ կառավարիչները դրա մասին կխոսեն։ Կառավարիչները նույնիսկ չեն խոսում, երբ Ադրբեջանի նախագահը Բաքվից այստեղ տեսակապով հաթաթա է տալիս»,- ասաց Հայկ Մամիջանյանը։
Ըստ նրա՝ Հայաստանում ուրախ են տեսնել եվրոպացի բարձրաստիճան պաշտոնյաներին, բայց ուրախ չեն տեսնել՝ որպես Փաշինյանի նախընտրական շոուի մի մաս:
Մամիջանյանը նշեց՝ Հայաստանում այսօր և երեկ հավաքվել են մարդիկ, որոնք իրենց համարում են մարդու իրավունքների, քրիստոնեա-դեմոկրատական արժեքների ջատագովներ և պահապաններ։
