Ես չեմ կարող ողջունել ձեր այցը Երևան, որը տեղի է ունենում ընտրություններից մեկ ամիս առաջ, և սա պատահականություն չէ։ Սա իրականում քաղաքական ներքին կյանքին միջմտություն է, որը փաթեթավորել եք դիվանագիտության լեզվով, նախագահական նստավայրի դիմացի այսօրվա բողոքի ակցիայի ժամանակ հայտարարեց Արցախի ԱԺ «Արդարություն» խմբակցության պատգամավոր Մետաքսե Հակոբյանը՝ իր խոսքն ուղղելով ՀՀ-ում գտնվող ԵՄ բարձրաստիճան պաշտոնյաներին, Ֆրանսիայի նախագահ Էմանուել Մակրոնին։
Արցախցի նախկին պաշտոնյան շեշտեց՝ եվրոպական վերնախավն արցախցիների համար ամենածանր պահին լռել է կամ ընդամենն արել ձևական հայտարարություններ։
«Այսօր եկել եք կապիտալիզացնելու այն, ինչ այս ընթացքում տեղի ունեցավ, ինչի արդյունքում 120 հազար հայեր դարձել են թափառական աշխարհով մեկ։ Այս ամենն արեցիք, որպեսզի ունենաք ազդեցության գոտիներ, վերահսկելի իշխանություններ Հայաստանում։
Արցախի ողբերգությունը ձեզ համար առաջնահերթություն չի եղել ու չկա։ Տարիներ շարունակ, հատկապես հիմա այն որպես գործիք եք օգտագործում, որպեսզի կարողանաք տարածաշրջանն ընդամենը կառավարեք»,- ասաց Մետաքսե Հակոբյանը։
Նա շեշտեց՝ եվրոպացի գործիչների՝ ընտրություններից առաջ Հայաստան գալը ցուցադրական աջակցություն է այս իշխանություններին։
«Իսկ գործող իշխանությունները, բնականաբար, փոխանակ պաշտպանեն պետության ինքնիշխանությունը, պետության ազգային շահը, վերածվել են ընդամենն այդ ազդեցության փոխանցման գործիքի։
Ստացվում է, որ վտանգված է ոչ միայն մեր անցյալը, վտանգված է մեր ներկան, նաև մեր ապագան»,- ասաց նարցախցի նախկին պատգամավորը։
«Ձեր բոլոր խոսքերը կեղծ են այնպես, ինչպես որ դուք եք. այն ամենը, ինչ տեղի է ունենում հիմա, պատասխանատվություն կրելու եք բոլորդ միասին։ Եթե չկան երկակի ստանդարտներ, եթե իրականում ժողովրդավարությունն է առաջնահերթությունը, ապա ես, որպես Արցախից բռնի տեղահանված, կոչ եմ անում ձեզ պաշտպանել մեր իրավունքները, օգնել որպեսզի կարողանանք վերադառնալ մեր տներ, մեր զոհվածների մայրերը գնան իրենց որդիների շիրիմներին և ծաղիկներ դնեն, օգենք մեր գերիները վերադառնան հայրենիք։ Հակառակ դեպքում դուք նույն յաթաղանն եք բռնել ձեր ձեռքին, ինչ 100 տարի առաջ բռնել էր թուրքը, մի քանի տարի առաջ բռնել էր ադրբեջանցին»,- ասաց Մետաքսե Հակոբյանը։
