Հայաստանի ատոմակայանն, անկասկած, պետք է փակվի և փոխարինվի նորով։ Այս մասին այսօր լրագրողների հետ զրույցում ասաց ԱԺ «Հայաստան» խմբակցության պատգամավոր Արթուր Խաչատրյանը՝ հիշեցնելով, որ Մեծամորի ատոմակայանի գործողության ժամկետն արդեն իսկ 20 տարով երկարաձգվել է, բայց ինչ-որ պահի այն պետք է փակվի։
«Հայաստանը չի կարող իրեն թույլ տալ ատոմային էլեկտրակայան չունենալ, որովհետև ատոմային էլեկտրակայանը Հայաստանը բերում է աշխարհաքաղաքական հարթություն։ Այն երկրները, որոնք ունեն ատոմական, նրանք մի քիչ այլ կարգավիճակ ունեն. դա ընտրյալների ակումբի հարց է։ Բայց պետք է հասկանանք, որ ատոմակայանը միայն էներգիայի աղբյուր չի, դա քաղաքական պայմանավորվածությունների արդյունք է։ Ասել՝ այսօր սրան եմ խոսք տալիս, վաղը նրան եմ խոսք տալիս, ֆրանսիացիների հետ եմ բանակցում, ամերիկացիների հետ եմ բանակցում, ռուսների հետ եմ բանակցում… Իհարկե պետք է բանակցես, բայց քաղաքական կողմնորոշումը այստեղ ավելի կարևոր է՝ ապահովությունը պահելով»,-ասաց նա։
Անդրադառնալով տեղեկություններին, որ ԱՄՆ կողմից հետաքրքրություն կա Սյունիքի օգտակար հանածոների և ուրանի հանքի նկատմամբ, և Վենսի այցը նաև այս հարցերն է շոշափելու, ընդդիմադիր պատգամավորն ասաց.
«Պետք չի փորձագետ լինել տեքստ կարդալու համար. հստակ հունվարի 14-ի փաստաթղթում գրված է, որ Ամերիկայի շահը միներալներն են՝ այսինքն՝ հանքանյութերը, օգտակար հանածոները և հազվագյուտ հողային մետաղները։ Ամերիկացիները չեն էլ թաքցնում, որ իրենք շահագրգռված են, հետաքրքրված են Սյունիքի հանքային ռեսուրսներով»։
