«ՀՀ-ԵՄ գործընկերության ռազմավարական օրակարգ» վերնագրով փաստաթուղթը, որը ստորագրվել է Եվրամիության և Հայաստանի միջև դեկտեմբերի 2-ին, Բրյուսելում, լուրջ մտահոգություններ է առաջացնում և, ընդհանուր առմամբ, հակասում է Ադրբեջանի և Հայաստանի միջև խաղաղության օրակարգին․ հայտարարել է Ադրբեջանի ԱԳՆ-ն։
Ես սպասում էի, որ Ադրբեջանի կողմից անպայման արձագանք լինելու է։ Ավելին` նման սպասման համար հիմք էր ժամանակին Ալիևի այն հայտարարությունը և դրա հետևողական ռեալիզացիան, որ Հայաստանը զարգացման առումով պետք է միշտ լինի սահմանափակված, որպեսզի չկարողանա վտանգ լինել Ադրբեջանի համար (մոտավոր միտքն եմ նշում):
Հիմա սա ուղիղ միջամտություն է միջազգային հարաբերությունների երկու սուբյեկտների հարաբերություններին, ավելին` տպավորություն է, որ այլևս Բաքվում է որոշվում, թե Հայաստանը ում հետ ինչ հարաբերություններ, ինչ բովանդակության համագործակցություն կարող է ունենալ։
Եթե ուզում եք հասկանալ, թե ինչքանո՞վ է Հայաստանն ինքնիշխան պետություն այսօր, ապա հետևեք ՀՀ իշխանությունների արձագանքին (եթե լինի):
Արա Պողոսյան, քաղաքագետ
***
Ինչպես հայտնել ենք, Ադրբեջանի արտաքին գործերի նախարարությունը մեկնաբանություն է տարածել՝ նշելով, որ Եվրոպական Միության և Հայաստանի միջև ստորագրված «ԵՄ-Հայաստան գործընկերության ռազմավարական օրակարգը» «հակասում է» Ադրբեջանի հետ խաղաղության օրակարգին։
«Բաքուն «լուրջ մտահոգված է» մի շարք հարցերի առաջնահերթության սահմանմամբ, որոնք «խեղաթյուրում են հետհակամարտական շրջանի իրականությունը և ընդհանուր առմամբ հակասում են Ադրբեջանի և Հայաստանի միջև խաղաղության օրակարգին»՝ այս տարվա դեկտեմբերի 2-ին Բրյուսելում կայացած ԵՄ-ՀՀ գործընկերության խորհրդի 6-րդ նիստից հետո ստորագրված «ԵՄ-ՀՀ գործընկերության ռազմավարական օրակարգ» փաստաթղթում»,-հայտարարել է պաշտոնական Բաքուն։
Կարդացեք նաև՝ Ադրբեջանը դեմ է արտահայտվել Հայաստանի և ԵՄ-ի միջև կնքված փաստաթղթին
