Ամիսներէ ի վեր ծանուցուած՝ Գանատահայ առաջին թերթ, եռալեզու «Ապագայ»ի 50-րդ Ոսկեայ տարեդարձը նշուեցաւ աննախընթաց խանդավառ մթնոլորտի մը մէջ Նոյեմբեր 1-ին, Centre Arme՛nie կեդրոնի շքեղ սրահին մէջ, մասնակցութեամբ աւելի քան 300 ներկաներու:
Մեր գաղութի ամենանշանակալից յոբելենական անկիւնադարձային առիթներէն մէկն էր այս տօնակատարութիւնը, որ տեղի կունենար օրհնութեամբը Գանատահայ թեմի հոգեւոր առաջնորդ՝ Տէր Աբգար Եպս. Յովակիմեանի եւ հովանաւորութեամբը Գանատայի մօտ Հ.Հ. դեսպան Տիկ. Անահիտ Հարութիւնեանի: Այս առիթն էր նաեւ «Ապագայ»ի տարեկան նուիրահաւաքին որուն այս տարի մասնակցած էին աննախընթաց թիւով «Ապագայ»-ի եւ Մոնթրէալի Թէքէեան Մշակութային Միութեան երկար տարիներէ ի վեր նիւթապէս իրենց զօրակցութիւնը յայտնած ազնիւ ազգայիններ: Այս երեկոյթին աւանդութիւն դարձած երաժշտական երկրորդ բաժնին համար այս տարի հրաւիրուած էր հայկական նորագոյն երգերու մեկնաբանող Սոֆի Մխեյանը:
Երեկոյթի սկզբնաւորութեան տեղի ունեցաւ «Ապագայ»ի 50 տարիներու ընթացքին Գանատահայ գաղութին նկատմամբ ունեցած դերին պատմական նշանակութիւնը արտացոլող տպաւորիչ բաժին մը: Օրուան հանդիսավար Տիկ. Սալբի Հալաճեան-Մարկոսեանը բացման խօսքերէն ետք հրաւիրեց «Ապագայ»ի խմբագիր պրն. Աւետիս Պագգալեանը որ տպաւորիչ կերպով ներկայացուց նախ ընդհանրապէս հայ մամուլի դերը եւ «Ապագայ»ի կարեւոր դերը մեր գաղութին եւ հայ իրականութեան համար: Ապա՝ հանդիսավար Տիկ. Մարկոսեան հրաւիրեց Թէքէեան Մշակ. Միութեան Միացեալ Նահանգներու եւ Գանատայի Կեդր. Վարչութեան ատենապետ եւ «Ապագայ»ի գլխաւոր հիմնադիրներէն մէկը հանդիսացող Դոկտ. Արշաւիր Կէօնճեանը՝ փոխանցելու համար իր սրտի խօսքը: Դոկտ. Կէօնճեան հանգամանօրէն եւ կուռ ելոյթի մը ընթացքին նախ գնահատանքով մատնանշեց մեծ վաստակը 50 տարիներու ընթացքին «Ապագայ»ին ծառացած նուիրեալներու խումբին, որոնցմէ այժմ, աւա՜ղ, մեծ թիւ մը յաւէտ բաժնուած են մեզմէ: Յետոյ ստորագծեց, թէ «Ապագայ»ի հիմնադրութիւնը 50 տարիներ առաջ պատահականութեան հետեւանք չէր երբեք, այլ արդիւնքն էր ծրագրուած եւ հետեւողական աշխատանքի մը, որուն նպատակը նորաստեղծ գանատահայութեան ուժեղ ազգային նկարագիր տալն էր եւ կապ հաստատել նոր այս գաղութին ու հայրենիքին եւ ամբողջ հայ աշխարհին հետ: 50 տարիները որոնց վաստակը կը նշենք այսօր, ան ըսաւ թէ իսկական անվերջանալի ճակատամարտ մըն է, որ ոչ սկիզբ ունի եւ ոչ ալ վերջ:
Այստեղ Դոկտ. Կէօնճեան ճակատամարտի իր ակնարկութեան անդրադառնալով և յատուկ յուզումով, միտքի ոստում մը կատարելով պատեհ նկատեց հանդիսականներուն ներկայացնել այս երեկոյթին Հայաստանէն հիւրաբար ներկայ գտնուող Ազգային հերոս, փոխգնդապետ Սարգիս Ստեփանեանը: Ան ըսաւ, թէ գնդապետ Սարգիս Ստեփանեանը Ղարաբաղեան վերջին հերոսական ճակատամարտերուն կորսնցուցած է իր մարմնի չորս անդամներէն երեքը: Յոտնկայս ծափահարութիւններով բոլոր ներկաները իրենց յարգանքը յայտնեցին հայրենի հերոսին:
Դոկտ. Կէօնճեանի ելոյթէն ետք դեսպան Անահիտ Հարութիւնեան իր գնահատանքը յայտնեց «Ապագայ»-ի 50 տարիներու հետեւողական լայնամիտ եւ հայրենամէտ՝ ազնիւ լրագրական վաստակին համար, ինչպէս նաեւ բոլոր անոնց, որոնք դժուարին այս աշխատանքը կը կատարեն երկար տարիներէ ի վեր մասնաւոր կերպով գնահատելով աշխատանքը ներկայ խմբագիր պրն. Աւետիս Պագգալեանին, «Ապագայ»ի առաջին խմբագիր պրն. Արսէն Նուպար Մամուրեանին եւ մասնաւորապէս գաղութի հիմնական ենթակառոյցներու ստեղծման մէջ որոշիչ իր դերը կատարած Դոկտ. Արշաւիր Կէօնճեանին: Ապա, հանդիսավար Տիկ. Մարկոսեան հրաւիրեց Առաջնորդ Սրբազան Հայրը, որ իր կարգին բարձր գնահատանքով վեր առաւ «Ապագայ» շաբաթաթերթի կատարած կարեւոր առաքելութիւնը գանատահայ մեր գաղութին մէջ 50 տարիներէ ի վեր եւ մանաւանդ այն դժուար շրջաններուն, ուր մեր եկեղեցին ու հայրենիքը կ անցնին տագնապալից ժամանակներէ: Առաջնորդ Սրբազանը եւս վեր առաւ մեր ազգային գլխաւոր կառոյցներուն եկեղեցի, հայ դպրոց եւ հայ մամուլ զիրար ամբողջացնող շղթային կենսական կարեւորութիւնը եւ անոնց ստեղծման առաջին օրերէն ի վեր իրենց մեծ բաժինը բերած ղեկավարներուն, որոնցմէ մեր մէջն է այսօր Դոկտ. Արշաւիր Կէօնճեանը: Ան իր ջերմագին գնահատանքը եւ հայրական օրհնութիւնը տուաւ ազգանուէր այս աշխատանքին:
Երեկոյթին ամբողջ այս առաջին բաժնին ընթացքին, բեմին վրայ զետեղուած լայն պաստառին վրայ շարունակական ընթացքով կը ներկայացուէր խնամքով պատրաստուած վիտէօ նկարահանում մը որուն մէջ կ՛երեւային նմուշներ «Ապագայ»ն 50 տարիներու թիւերէն առնուած էջեր: Կերպով մը անոնց մէջ կ երեւար թէ գանատահութեան եւ թէ հայ աշխարհի մեծ իրադարձութիւնները եւ ականաւոր դէմքերը: Մասնաւորապէս հոն կ՛երեւային «Ապագայ»-ի միւս գլխաւոր հիմնադիրներ՝ վախճանեալ Տոքթ. Յարութիւն Արզումանեանը եւ Երուանդ Ազատեանը, ինչպէս նաեւ ազգային անփոխարինելի իմաստուն բարերար Ալեք Մանուկեանի նկարները:
Այս հանգրուանին ահա ժամանակը հասած էր, և հետեւաբար Տիկին Սալբի Մարկոսեան, գեղեցիկ կերպով ներկայացուց եւ որոտընդոստ ծափերու մէջ բեմ հրաւիրեց բոլորին կողմէ անհամբեր սպասուած, հայ նորագոյն երգերու սիրուած կատարողներէն՝ Հայաստանէն յատկապէս այս առիթով հրաւիրուած տաղանդաշատ Սոֆի Մխեյանը, որ սկսաւ իր ելոյթը ելեկտրականացած մթնոլորտի մը մէջ, հրաշալի կատարողութեամբ երգելով Կոմիտասի անմահ «Հորովելը»:
Այնուհետեւ Սոֆի ակնթարթի մը մէջ անցաւ իր բոլորովին նոր ոճով եւ սակայն միշտ պահելով հայկական հարազատ պարունակութիւնը, երգերու անմրցելի խանդավառութիւն ստեղծող շարքը: Սոֆի Մխեյանը երեկոյթի ամբողջ ընթացքին ցոյց տուաւ իր կարողութիւնը ամբողջ սրահ մը ոտքի պահելու շարունակական պարի, ծափի, շուրջպարի եւ մենապարի մթնոլորտի մը մէջ:
Տիկին Սալբի Հալաճեան-Մարկոսեանը յայտարարեց, թէ պիտի տեղի ունենար 50-ամեայ յոբելեանի աւանդական կարկանդակի հատումը, որուն համար անգամ մը եւս հրաւիրեց Սրբազան Հայրը եւ Տիկին դեսպանը գլխաւորելու երեսունէ աւելի ներկայ կնքահայրերու խումբը: Բնականաբար այնտեղ էին Դոկտ. Արշաւիր Կէօնճեանը ,խմբագիր Աւետիս Պագգալեանը, Թէքէեանի ատենապետ պրն. Նուպար Պապիկեանը եւ ՌԱԿ Էօժէն Բաբազեան ակումբի ատենապետ Արա Պալեանը, որոնք բոլորը լուսարձակներու տպաւորիչ ճառագայթներուն մէջ հատեցին «Ապագայ»-ի 50 տարիներու վաստակը ներկայացնող գեղեցիկ կարկանդակը: Ներկաները պատրաստ էին սակայն վերադառնալու Սոֆի Մխեյանի առաջնորդութեամբ երգի եւ պարի տօնախմբումին: Այսպէսով սկսաւ տօնական աննախընթաց այս երեկոյթին վերջին բաժինը, ուր Սօֆին որ այլեւս կախարդած էր հանդիսականները իր առինքնող կատարողութեամբ, անմիջապէս վերադարձաւ իր աւելի եւս խանդավառ, մերթ հանդարտ երգերուն: Երեկոյեան ուշ ժամերուն վերջապէս հակառակ ներկաներուն շարունակուող խնդրանքներուն Սօֆին իր նոյն կախարդական դարձուածքներով ելոյթը հասցուց իր աւարտին, ծափերու տեղատարափին տակ:
Անկասկած, Մոնթրէալի հասարակութեան աննախընթաց խանդավառ երեկոյթներէն մէկն էր, որ այսպէսով կ՛աւարտէր: «Ապագայ»-ի 50 տարիներու վաստակաշատ յոբելեանը տպաւորիչ կերպով արձանագրուած էր մեր գաղութին տոմարներուն մէջ:
Բարի ոսկեայ տարեդարձ սիրելի «Ապագայ»-ին:
Բոլորին վարձքը կատար:
Թղթակից
