Փորձում են ամեն ինչ անել, որ հանդիպումը չլինի։ Ասեցին՝ ԳՇ պետի տեղակալը կգա, վեց հոգու հետ կհանդիպի, լրագրողների հետ զրույցում ասաց անհետ կորած Սարգիս Ղուկասյանի հորեղբայր Արսեն Ղուկասյանը։
Հիշեցնենք՝ անհետ կորած զինվորների հարազատները կեսօրից բողոքի ակցիա են իրականացնում ՊՆ-ի դիմաց։
«Մենք այսքան ժամանակ Ասրյան Էդոյին չենք տեսել (նկատի ունի ԶՈՒ գլխավոր շտաբի պետ Էդուարդ Ասրյանին՝ խմբ.)։ Ոչ մի այլ կառույցի հետ այսքան պրոբլեմատիկ չի եղել։ Հայցերը եվրադատարանից հետ են կանչում, ՊՆ-ն ձեռները թափ է տվել, քաշվել մի կողմ։
ԱԱԾ-ն այսօր գնում, տասը հոգու համար է բանակցում։ Արդյունք ունե՞նք. մեզ արդյունքն է հետաքրքրում, ոչ թե բանակցության ընթացքը։ Ինձ կարևոր է, որ իմ երեխուց լուր բերեն՝ ո՞ղջ են, զոհվա՞ծ են, ո՞ւր են։ Մենք ՊՆ-ին ենք տվել մեր երեխաներին, մեր երեխաներն ԱԱԾ-ի ծառայող չեն եղել, կառավարության աշխատող չեն եղել։ Էս կառույցը մեր երեխեքին տարել ա բանակ, քցել պատերազմի ամենաթեժ կետերը, քաշվել մի կողմ։ Վսյո՞, դրանով միսիան ավարտվե՞ց։
Խի՞ չեն մի բան արել, մեր երեխեքին բերեն։ Խի՞ են ձեռները թափ տվել, քաշվել մի կողմ։ Անունը ՊՆ է, ո՞ւմ են պաշտպանում»,- հարց հնչեցրեց անհետ կորած զինծառայողի ազգականը՝ հավելելով, որ բարձրաստիճան պաշտոնյաները՝ ԶՈՒ գլխավոր շտաբի պետ Էդուարդ Ասրյանը, Արցախի ՊԲ նախկին հրամանատար Կամո Վարդանյանը և ԶՈւ ԳՇ հետախուզության գլխավոր վարչության նախկին պետ Առաքել Մարտիկյանը չպետք է կասկած ունենան՝ ի վերջո հանդիպելու են իրենց և հաշվետվություն են ներկայացնելու։
