Փաշինյանի նոր գրառումը «ֆաս» հրահանգի նշանակություն ունի քպ-ականների համար։ Հիշեցնենք, թե ինչ է գրել նա. «Երբ ժողովուրդը ուրախ է, բանավեճից փախչող հայտնի եռյակը տխուր է։ Հիմա ժողովուրդը ուրախ է, որ խաղաղություն է, որ զինվոր չի զոհվում։
Իսկ բանավեճից փախչող եռյակը դրանից ընկճախտի մեջ է հայտնվել։ Զոհերի իրական թիվը նրանց բավարար չէ եւ առիթը բաց չեն թողնում զոհերի իրենց երազած թվերը բարձրաձայնելու, մանավանդ որ «թարսի պես» այդ թիվը չի ավելանում։
Հիմա էն ասեք, բանավեճի գալու՞ եք, թե ոչ»։
Այս հրապարակումից րոպերեն անց քպ-ականները սոցցանցերում «թևերը փռել են» շեֆի վրա՝ ատամներով պաշտպանելով նրան։ Օրինակ՝ Փաշինյանի աշխատակազմի ղեկավար Արայաիկ Հարությունյանը գրել է.
«Բաքվի դատարանում գտնվողները միջնորդել են դատարան կանչել վարչապետ Փաշինյանին և արտգործնախարար Միրզոյանին:
Բայց եթե հայտնի չէ, թե նրանք ինչ պայմաններում են նման միջնորդություն արել, ապա սարսափելի է, երբ Հայաստան պետության ղեկավարի պաշտոնը զբաղեցրած արատավոր եռյակը Երևանից է ցուցմունք տալիս մեր պետության գործող ղեկավարի դեմ՝ վերջին պատերազմի մեղավորությունը ամբողջությամբ «բարդելով» գործող ղեկավարի վրա:
Այս գործակալական ցանցը կործանել է Հայաստանի Երրորդ Հանրապետությունը: Սրանից էլ լա՞վ հիմնավորում, թե ինչու է պետք հաստատել ու ամրապնդել Չորրորդ Հանրապետությունը»:
Երևանի փոխքաղաքապետ Արմեն Փամբուխչյանը հետևյալ գրառումն է արել.
«Երբ քո երկրի երեք նախագահ աշխատած մարդիկ ուղիղ ցուցմունք են տալիս քո երկրի դեմ, ապա օտար երկրներին պետք չէ ներդնել գործակալներ տարբեր օղակներում, քանի որ իրենք ունեն գործակալ պետական գաղտնիք կրող առաջին դեմքերի մակարդակով»:
Կարծում ենք՝ «ֆաս» հրահանգին հետևողներ դեռ էլի կլինեն։
