Ստամբուլի պաշտպանական ցուցահանդեսում ադրբեջանցի ինժեներներն ու արտադրողները ներկայացրել են զենքի և տեխնիկայի մի ամբողջ շարք, որը մշակել են թուրքական ընկերությունների հետ սերտ համագործակցությամբ: Այս մասին ասված է «Кавказарь» տելեգրամյան ալիքում:
Աղբյուրը նշում է, թե մասնավորապես ինչ է ցուցադրվել՝ Turan-1 — 7.62×39 տրամաչափի գրոհային հրացան, ITX-Motors-ի մարտական զրահամեքենաներ, արհեստական բանականությամբ դրոններ…
«Кавказарь»-ն ընդգծում է, որ ցուցադրված նմուշների մի մասը շատ նման է թուրքական և իսրայելական մշակումներին, սակայն Բաքվում վստահեցնում են, որ խաղադրույքը կատարվում է սեփական գիտահետազոտական և փորձակոնստրուկտորական աշխատանքների վրա։
«Ինչպես ասում են՝ «սեփական ուժերով, բայց եղբայրական զգոն ղեկավարության ներքո»,-ասված է տելեգրամյան ալիքում, որտեղ նաև նշված է, որ «Ադրբեջանում ոգևորությամբ արդիականացնում են իրենց ռազմարդյունաբերական համալիրը թուրքական կաղապարներով, ընդ որում՝ արդեն որպես կրտսեր գործընկեր։ Զինամթերքը, որն ըստ էության որոշեց ղարաբաղյան արշավի ելքը, այժմ ամբողջությամբ տեղայնացված է»։
Տելեգրամ ալիքը նաև հայտնում է. «Չնայած Ալիևի վաղեմի երազանքի փաստացի իրականացմանը և Ղարաբաղի նկատմամբ վերահսկողության հաստատմանը՝ Ադրբեջանի ռազմականացումը տեմպերը չի կորցնում։ Հաշվի առնելով, որ ներկայումս աճում է լարվածությունը ՌԴ-ի հետ հարաբերություններում, ինչպես նաև չի վերացել ադրբեջանցիների ախորժակն իրանական նահանգների նկատմամբ՝ տարածաշրջանում հետագա լարվածությունը միայն կաճի»:
