Երկու դեպք, միևնույն սկզբունք, բայց ՄԻՊ-ի կողմից՝ երկակի չափանիշ

«Հինգ իրավապաշտպանների նախաձեռնությունը» կրկին անդրադարձել է 8 ամսական երեխայի հետ 3 ամսով կալանավորված Լիանա Հարությունյանի աղմկահարույց դեպքին։

Հայտարարության մեջ ասվում է.

Երեք անչափահաս երեխաների մոր կալանավորման դեպքը բուռն հասարակական արձագանքի արժանացավ։ Այս իրավիճակում, երբ ամբողջ ուշադրությունը պետք է լիներ մոր և երեխաների իրավունքների էական խախտումների վրա՝ նրանց ազատության իրավունքի պաշտպանության երաշխավորման համատեքստում, Մարդու իրավունքների պաշտպանը, մեր գնահատմամբ, ընտրեց ուշադրությունը շեղելու ուղին՝ քննադատելով փաստաբանի կողմից երեխայի լուսանկարի հրապարակումը։

Մեր գնահատմամբ փաստաբանի այդ հրապարակումը միտված էր ոչ թե շահարկման, այլ հանրային ուշադրություն հրավիրելու՝ ի շահ հենց երեխաների։ Սա իրավաչափ և պատասխանատու քայլ էր։

Թեև ՄԻՊ-ը հիմնավորել էր փաստաբանին հասցեագրած իր քննադատությունը «երեխայի լավագույն շահի» սկզբունքով, նույն սկզբունքը մի քանի ժամ անց նա չկիրառեց՝ երբ համացանցում տարածվեց կորած 4-ամյա երեխայի լուսանկարը՝ ոստիկանության ծառայողի գրկում։ Այդ լուսանկարը տարածվել էր լրագրողի կողմից, ով հայտնի է ոստիկանության գործունեությունն ակտիվ լուսաբանման առումով, և լուսանկարը տարածելով՝ թերևս նույնպես առաջնորդվել էր կարևոր հանրային շահով՝ հանրային մեծ հնչեղություն ունեցող գործի օպերատիվ լուսաբանմամբ։

Երկու դեպք, միևնույն սկզբունք, բայց ՄԻՊ-ի կողմից՝ երկակի չափանիշ։

Այսպիսով՝

*ՄԻՊ-ն իր հայտարարությամբ փաստացի թիրախավորեց փաստաբանին։

*Լռելով մյուս դեպքի մասին՝ հաստատեց իր կողմնակալությունը։