Փաշինյանը շրջել է հայոց պատմության վերջին էջը, Ալիևն էլ գրիչը տվել է նրա ձեռքը, ասում է՝ վերջակետը դիր. Թևան Պողոսյանը՝ եկեղեցու դեմ արշավի մասին

Պարտված իշխանությունը նորանոր պարտություններ է բերելու, սպասարկելու է թշնամու օրակարգը։ Նրա գործողությունները նույն շարքի մեջ են՝ մոտեցնել հայոց պետականության ավարտը, Azg.am-ի թղթակցի հետ զրույցում նման համոզմունք հայտնեց քաղաքական վերլուծաբան Թևան Պողոսյանը՝ անդրադառնալով Փաշինյանի կողմից Հայ Առաքելական Եկեղեցու և անձամբ Գարեգին Բ կաթողիկոսի դեմ արշավին։

«Մոնթեն ասել է. «Կորցնելով Արցախը՝ կփակենք հայոց պատմության վերջին էջը»։ Հիմա պատկերացրեք՝ Նիկոլ Փաշինյանը շրջել է վերջին էջը, Ալիևն էլ գրիչը տվել է նրա ձեռքը, ասում է՝ վերջակետը դիր։

Երբ պետք էր գեներալների դեմ պայքարել, մի մեխանիզմ էր կիրառվում, երբ պետք է եկեղեցու դեմ պայքարել՝ մեկ այլ, բայց գլխավոր մոտեցումն ու նպատակը, կրկնում եմ, հայոց պետականության վերացումն է։ Թշնամին Փաշինյանից դա է պահանջում, ինքն էլ թշնամու շահերն է սպասարկում։

Այնպես չէ, որ քնել-արթնացել է, որոշել է, որ պետք է աստվածավախ դառնա։ Եթե այդպես է, ուրեմն ինչու պարտություն կրելուց հետո ինքնակամ դիմում չգրեց, չհեռացավ։ Հետևապես Հայ Առաքելական Եկեղեցու և Գարեգին Բ-ի դեմ Փաշինյանի արշավը կապ չունի ո՚չ հավատքի, ո՛չ էլ աստվածավախության հետ. կապ ունի միայն թշնամու շահերը սպասարկելու, հայոց պետության և պետականության, հայոց արժեքների և ինքնության վերացումը։ Եկեղեցին չլինի, վաղն ուրիշ բան է թիրախավորելու», բոլոր ինստիտուտներն իրար հետևից կազմաքանդելու է»,- ասաց Թևան Պողոսյանը։

Ըստ մեր զրուցակցի՝ իշխանությունների պետականակործան օրակարգը չսպասարկելու համար լրատվամիջոցներն առհասարկ չպետք է անդրադառնան  եկեղեցուն փնովող արշավին։

Հարցին՝ հնարավո՞ր է, որ Հայ Առաքելական Եկեղեցու դեմ արշավը Փաշինյանի հատուկ ծրագիրն է՝ ընտրություններից առաջ «հեղափոխական» գործընթացներ ապահովվել, Թևան Պողոսյանը պատասխանեց՝ պետությունը քանդվում է, ընտրությունների մասին խոսք լինել չի կարող։

«Եթե պետություն չկա, ի՞նչ ընտրությունների մասին խոսել։ Այսպես որ գնաց՝ ընտրությունների չենք հասնելու։ Լինելու են պրոցեսներ, որոնք արագացնելու են մեր կազմաքանդումը, որովհետև Փաշինյանին պետք է Հայաստանը վերացնել»,- ասաց քաղաքական վերլուծաբանը՝ միաժամանակ հավելելով, որ եթե Փաշինյան իր այս քայլերով պատրաստվում է գալիք ընտրություններին, ՀՀ քաղաքացիները ևս պետք է պատրաստվեն՝ անելով իրենցից կախված ամեն հնարավորը, որպեսզի Փաշինյանը չվերարտադրվի։

Հիշեցնենք, որ Նիկոլ Փաշինյանն իր հերթական ֆեյսբուքյան գրառման մեջ առաջարկում է անհրաժեշտ գործուն քայլեր ձեռնարկել՝ Վեհարանն ազատելու և կաթողիկոսական նոր ընտրություններ կազմակերպելու համար։ Նա միաժամանակ առաջարկում է ստեղծել համակարգող խումբ՝ կազմակերպչական հարցերը կարգավեորելու համար։